Giagtang pagpusil ang supporter sa kandidato

NABALBAG ang ulo sa usa ka habal-habal driver nga giingong supporter sa usa ka pulitiko human gipusil patay niadtong Lunes sa gabii sa barangay Lawaan, lungsod sa Dumanjug, Sugbo samtang siya namasahero.

Gikatahong ikaupat na kining insidente sa pagpamusil sa Dumanjug sukad nahuman ang init nga local nga eleksyon.

Ang biktimang si Erwin Rebosquillo, 30, minyo taga barangay Candabong, gipusil tumong sa agtang sa wa pa mailhing mamumuno nga daling nisibat human sa krimin.

Si Rebosquillo giingong supporter ni Mayor-elect Nelson Garcia nga nakig-atbang kang Efren "Gungun" Gica sa milabay nga election sa Mayo 10.

Apan Si Sr. Insp. Rodrigo Giangan, hepe sa Dumanjug police station nga gikahinabi sa Sun.Star Superbalita, niingon nga ilang gihikling ang isyu sa pulitika sanglit sa iyang pag-estorya sa inahan niini ug mga igsuon, wa kini mag-apil-apil.

Bisan siya supporter ni Garcia, wa gyud kini mag-apil-apil sa kampanya o maghisgothisgot kalabot sa iyang gilabanang kandidato.

Si Giangan nipasabot nga sa pagkakaron ang usa ka babaye nga maoy katapusan nga sakay sa biktima maoy ilang gilauman nga mamahimong testigos nga makahatag og yawe sa kasulbaran sa krimin.

Ang babaye naestorya sa iyang mga imbestigador ug gikuhaan na og dugang mga pamahayag kon unsay iyang nabantayan dihang gihatod siya sa biktima sa wa pa kini patya.

Giklaro ni Giangan nga way record sa kapulisan ang biktima nga nalambigit sa illegal nga kalihukan. Hinungdan nga ilang gisubay nga posibling personal grudge o kaha dunay gikaaway nga habal-habal driver si Rebosquillo.

Niangkon si Giangan nga naglibog gyud sila karon sa ilang imbestigasyon gumikan ning sunodsunod nga mga krimin sa pagpamusil sa ilang lungsud diin upat na kahigayon human sa election. (Guam P. Logroño Sun.Star Superbalita)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph