NAKABSAN sa iyang kinabuhi ang batan-ong lalake samtang nagpangayo og pakitabang human gidunggab sa pundok sa mga batan-on nga iyang nalabyan sa barangay Basak, dakbayan sa Mandaue.

Gibutyag ni SP01 Kerwin Bejer sa Investigation, Detection and Management Bureau (IDMB) sa Mandaue City Police Office (MCPO) nga kagahapon sa mga ala 1:45 sa kaadlawon nga samtang naglakaw ang maong biktima sa maong dapit kalit kining gidunggab sa wa mailhing suspek.

Sun.Star accepts donations for victims of Typhoon Ondoy

Giingong nakalakaw pa ug 20 metros ang biktima nga nangayo og pakitabang ngadto sa iyang masugatan apan sa pagdala sa tambalanan nakabsan kini sa iyang kinabuhi human nga naka-angkon ug samad dinunggaban sa iyang wala nga dughan.

Matod pa ni Bejer sa dihang nahinabi sa Sun.Star Superbalita nga sa ilang gihimong follow-up kagahapong adlawa aduna silay gisubay nga usa ka mahuyang nga giingong didto midagan sa iyang nahimutangan ang namatay.

“Amo pang sutaon kon katong bayot kaila ba sa biktima,” dason ni Bejer.

Atol niining pagsuwat wa pa mailhi sa kapulisan ang biktima nga gibana-bana nga nagpangidaron ug 18 ngadto na sa 20 anyos, 5’ feet ang gitas-on, gamayon ug panglawas, nagsul-ob ug kolor gray t-shirt, puti nga short pants nga adunay puwa nga bakos, nagsul-ob ug puwa nga kawo nga adunay ariyos sa iyang wala nga dunggan.

Gihulagway sa kapulisan nga yano ra nga nanglakaw ang mga suspek human nga midunggab sa maong biktima.

Ang biktima gihaya sa Cosmopolitan Funeral Homes sa Ibabao, Mandaue City. Giawhag kadtong nawad-an og sakop sa ilang pamilya sa pagsusi sa nahisgotang punerarya. (FVQ)