GIINGONG gikulata sa anak sa kapitan sa Barangay Opao, dakbayan sa Mandaue ang 1st Runner up sa Mr. Cebu dihang gikasuyaan siya nunot sa pagduol niya sa kanhing uyab niini sa usa ka bar sa dakbayan sa Sugbo niadtong Dominggo sa kaadlawon.
Si Hans Joakim Grogaard, 22, nagpuyo sa Urgello St., dakbayan sa Sugbo, nagpa-blotter sa Mabolo Police Station nunot sa iyang nahiaguman nga mga samad ug bun-og dihang giingong gikulata siya sa anak ni Opao Barangay Kapitan Joy Ouano nga nailang si Cris Ouano Mangubat ug kaubanan gawas sa Loft Bar nga nahimutang sa IT Park.
Ang Sun.Star Superbalita nitawag sa daghang mga contact number ni Ouano kagahapon aron makuha ang ilang habig ning pasangil batok sa iyang anak apan wa makontak.
Nibisita si Grogaard, kinsa napiling 1st Runner up sa Mr. Cebu 2008, sa buhatan sa Sun.Star Superbalita kagahapon aron pagsaysay sa iyang nahiaguman kang Mangubat mga alas tres sa ka-adlawon niadtong Dominggo sa Loft.
Gikuyogan siya sa kanhi uyab ni Mangubat nga si Stephanie Thomas, kanhi kandidata sa Miss Superbalita.
Matod ni Grogaard nga gipaadto siya ni Thomas sa Loft Bar aron mokuyog kanila samtang uban sa iyang mga kauban sa trabaho.
Iyang gitumbok nga gikasuyaan na siya ni Mangubat dihang nagkakuyog sila si Thomas. Gani, gisigihan siyag hagad og sumbagay ni Mangubat apan gibira siya ni Thomas balik sa ilang lamesa aron di mahitabo ang kagubot.
"Wa man mi gibuhat nga makapasuko niya," butyag ni Thomas sa Sun.Star Superbalita kagahapon. Nitataw siya nga moabot og lima ka tuig ang ilang relasyon ni Mangubat apan buwag na sila karong higayona.
Dihang gikan si Grogaard sa comfort room, gisigihan siyag painit sa suspek unya giduol siya sa mga kauban ni Mangubat nga silang Marvin Roma ug Gino Ortiz ug nahitabo ang ilang panaglalis.
Gitukmod siya ni Roma unya gikuha siya sa bouncer ug gipagawas sa bar. Nitumbok ang bouncer kaniya nga siya ang nagsugod sa kagubot.
Samtang, didto siya sa gawas sa Loft niabot si Mangubat nahitabo ang ilang panaglalis ug nisangpot nga gisumbag siya sa suspek unya nitabang ang mga higala niini.
Gitumbok niya ang laing kauban ni Mangubat nga si Jose Maria Caseñas nga maoy nigunit kaniya hinungdan nga gitabangan siya sa pagsumbag hangtod nga natumba siya sa dalan. Iyang nahinumduman nga moabot gyod og pito ka tawo ang nikulata kaniya. (JECT)