Ginang gipusil patay; 3 ka oras una nakit-an

Friday, March 19, 2010

PANAGBANGI sa yuta ang gitutokan karon nga motibo sa kapulisan sa pagpusil patay sa usa ka ginang sulod sa ilang balay sa milabay nga hapon sa N. Bacalso avenue, siyudad sa Sugbo.

Apan ang lawas sa biktima mga pasado alas 6 na sa gabii nakaplagan sa iyang 14-anyos nga anak nga lalake.

Have something to report? Tell us in text, photos or videos.

Click here for Election 2010 updates

Gikataho nga ang biktima dunay gipasaka nga kaso batok sa mga nag-ukopar sa ilang luna ug nadisisyonan sa korte pabor sa biktima.

Si Cleofe Bonachita, 58, napalgang samdan sa iyang nawong ug tiyan.

Gituohang tulo ka mga oras na ang gidugayon una pa siya nadiskubrehan sa iyang mga anak kay alas 3 pasado pa man sa hapon dihang nakadungog ang mga silingan og buto sa pusil.

Ang pasiuna nga imbestigasyon ni SPO3 Rey Cuyos sa Homicide Section sa Cebu City Police Office (CCPO) nagbutyag nga ang anak sa biktima nga si Charles ang unang nakadiskubre sa iyang inahan.

Gikan pa siya sa tunghaan dihang pag-abot niya lock ang gate. Hinungdan nga iyang gilili ang gate ug didto niya makita ang iyang inahan nga nagbuy-od duol sa gate.

Nangayo siya og panabang sa ilang mga silingan.

Sa dihang nakasulod na sila sa gate kay dunay nikatkat aron maablihan ang gate gikan sa sud, didto na nila nadiskubrehan ang mga samad pinusilan.

Dugang nasayran sa kapulisan nga ang mga silingan nakadungog og buto-buto pasado alas 3 sa hapon, apan wa sila magtuo nga buto kadto sa armas de fuego.

Gipatawag usab ang igsuon sa biktima ug giimbestigar human makadawat og taho ang kapulisan nga gikabangi niini ang biktima pipila ka mga semana ang nakalabay.

Ang igsuon nipasalig nga andam siyang mopaubos sa paraffin test kon gikinahanglan man.

Dugang nasayran gikan sa kapulisan nga posibling dunay tawo nga nisangpit sa biktima gawas sa gate.

Dihang nilili ang biktima sa lungag aron mosusi kini ang nanangpit, gipusil kini hinungdan nga ang nawong dunay samad pinusilan.

Bisan pa man sa kadaghan sa mga silingan nga anaa sa palibot, way ni bisan usa ang nibarog nga nakakita sa maong hitabo.

Ang mga silingan nga gipangutana sa kapulisan igo lang niingon nga nakadungog sila og buto sa pusil, apan wa nila kini panumbalinga sa pagtuo nga kini rebentador.

Daling gidala ang biktima sa tambalanan, apan pag-abot gideklarar nga dead on arrival.