LALAKE nga gituohang usa ka kawatan ang gipusil sa makadaghang mga higayon sa usa ka tawo nga nagsakay sa usa ka sakyanan didto sa Carcar city.

Human siya patya, giguyod pa siya sa tawo gamit ang sakyanan ug gibiyaan sa unahan diin siya pusila gamit ang usa ka gituohang 9mm pistol.

Sun.Star accepts donations for victims of Typhoon Ondoy

Ang kapulisan sa lungsod nakadawat og report niadtong Biyernes nga adunay gipusil sa may tulay sa national highway sa barangay Valladolid, pasado alas 4:00 sa kaadlawon.

Daling niresponde ang mga pulis pinangulohan ni SPO1 Jerome Tanodtanod.

Base sa ilang pasiunang imbestigasyon ang biktima naglakaw bitbit ang usa ka battery sa sakyanan.

Samtang siya naglakaw, niabot ang sakyanan luwan ang usa ka wa mailhing tawo ug nipusil sa biktima sa makadaghang mga higayon.

Ang biktima namatay diha-diha sa kadaghan sa mga samad nga iyang naangkon.

Gisuwayan pa siyag dala sa mga tawo sa dapit sa Carcar District Hospital apan gideklarar ni Dr. Emily Familgan nga patay nang nidangat sa tambalanan.

Sigon sa mga saksi nga human gipusil ang biktima, gipaguyod ka kini sa sakyanan nga duol sa nahitaboan.

Nakuha sa kapulisan gikan sa crime scene ang duha ka mga battery sa sakyanan, upat mga kabhang sa bala, usa ka slug nga pulos sa 9 mm pistol ug tsenilas.

Ang wa mailhing biktima daling gidala sa Tupaz Funeral Homes didto ra usab sa Carcar.

Ang biktima gibanabana nga adunay pangidaron nga 29 ngadto sa 35 anyos, nagkarsones og itom, nagtsenilas og puti, ug coat nga kolor green.

Hinuon kagahapon ang lawas gikatahong gikuha na ug giingong taga lungsod sa Naga, apan wa magpa-blotter sa kapulisan sa Carcar ang mga tagtungod.

Samtang sa lungsod sa Ronda, usa ka tawo ang gipusil patay sa wa mailhing lalake niadtong miaging gabii sa brgy. Malalay.

Ang biktima nga si Isidro Pesalbon, 29, biyudo, mag-uuma, naigo sa buko-buko.

Siya gideklarar nga patay nang nidangat sa ospital sa lungsod.