NADAKPAN sa entrapment operation ang tulo ka gidudahang mga sakop sa us aka sindikato human ang usa ka 66 anyos nga tiguwang babaye gideklarar nga patay sa iyang mga kababanay.
Ilang gikobra ang P100,000 nga benipisyo niini sa ilang kapunongan sa usa ka banko sa dakbayan sa Danao.
Ang mga sakop nila ni Chief Insp. Rene Kyamko sa Criminal Investigation and Detective Unit (CIDU) sa Criminal Investigation and Detective Group (CIDG-7) uban sa mga tinugyanan sa Fairbank sa Poblacion Danao City, nipahigayon sa entrapment kagahapon sa buntag.
Ang mga suspek giilang sii Eva Gomez, 42, taga barangay Guinacot sa nahisgutang siyudad ug mga kauban nga sila si Sabina Barriga, 51, chief barangay health workers (BHW) sa ilang barangay ug ang deputy niining si Remedios Hermoso, 57.
Samtang ang biktima giilang mao si Luciana Gomez, taga barangay Cabungajan, kinsa giapil sa pagdala sa kapulisan apan hugtanong nanghimakak sa pasangil nga may kalambigitan siya sa maong krimin.
Si Arturo Pacifico chief security officer sa Fair Bank Danao nibutyag nga ang mga akusado pulos sakop sa Kaabag Program sa ilang barangay.
Nabulabog ang ilang modus dihang niadtong Abril 12, si Marivic Toring, administrative officer sa Fair Bank, nibutyag nga dunay gideklarar nga patay nga usa ka Luciana apan sa ilang pagsusi didto sa gipuy-ang lugar, dako kining buhi.
Apan gumikan kay naaprobahan na man ang pag-claim sa benipisyo, g-atngan nalang nila sa security sa banko ug sa CIDG-7 ang pag-claim ni Eva sa P50,000 nga unang gi-release sa bangko.
Gidakop usab ang iyang mga kuyog ug ang mga ebedensya toa sa PNP Crime Laboratory nga dunay ultra violet powder.
Matod ni Pacifico nga nakuhaag deth certificate ang mga akusado gikan sa tambalanan sa dakbayan sa Danao.
Kini gipirmahan usab sa ilang hepe sa BHW nga si Barriga ug sa ilang narangay kapitan nga si Flordelito Almago.
Natala niini nga namatay si Luciana niadtong Marso 31, 2010.
Si Eva nga gikahinabi sa Sun Star SuperBalita nibutyag nga wa gyuy kalibutan ang iyang ugagan nga si Luciana labot sa ilang pagdeklarar niining patay sanglit gihaylo lang siya sa ilang silingan nga si Henarra Montes, kinsa nipasalig nga hatagan silag P10, 000 matag usa uban kang Hemoso ug Bariga.
Sila pulos nipasangil kang Montes nga maoy nipasalig kanila nga mopirma lang ug mo-claim ug siya nay bahala sa pagpalusot sa uban pang mga pamaagi nga ma-approve ang dukomento ug ma claim ang P1OO,000.
Samtang si Chief Insp. Rene Kyamko sa CIDU nibutyag sa Sun Star SuperBalita nga kasong estafa through falsification of public document kagahapong adlawa ang ilang ipasaka.
Sumala pa niya nga kaduha nang higayon nga ang maong bangko nga nailad diin niadto dunay naka claim apan napasakaan na hinuog kaso.
Hinuon nagtuo siya nga di kini dako nga sindikato kon d inner circle sa ilang kapunongan ang nagpalusot apan way swerte kay nasakpan. (Guam P. Logrono-correspondent Sun.Star Superbalita
)