KUSGANONG gisupak sa prosekusyon nga makapiyansa ang kontrobersyal nga pulis nga si Adonis Dumpit nga nag-atubang sa kasong murder nunot sa kamatayon ni Ronron Go niadtong 2004.
Ang mga abogado nga anaa sa habig ni Go nisumiter sa ilang mosyon ngadto kang Regional Trial Court (RTC) Judge Ester Veloso nga nagsupak nga makapiyansa si Dumpit.
Kon tugtan sa korte ang pulis nga makapiyansa kasamtangan siyang makalingkawas sa prisohan samtang magpadayon ang paghusay sa iyang kaso sa korte.
Niini, gihatagag 10 ka adlaw ang duha ka mga habig aron mosumiter sila sa ilang komentaryo ning gisang-at nga mosyon nga nagsupak nga makapiyansa si Dumpit.
Gikatakda nga magpadayon ang husay ning kaso ni Dumpit unya sa HUnyo 28 diin ang iyaha nang kampo ang mopresentar sa ilang mga testigo.
Dihang nipresentar ang prosekusyon sa ilang mga testigo nalakip ang inahan ni Go nga si Janeth Badana sa ilang testigo.
Si Dumpit gipasanginlang nga maoy nipusil kang Go atubangan sa ilang balay didto sa Villagonzalo II, dakbayan sa Sugbo niadtong Disyembre 14, 2004.
Human malutsi og warrant of arrest, si Dumpit mipauli sa Mindanao hinungdan nga wa siya masikop.
(JECT)