PANGULOHAN sa ALA boys nga sila si Z “The Dream” Gorres ug Mark Jason Melligen ang Pinoyng mga boksidor nga mopakita’g aksyon karong buntag (Biyernes sa gabii sa US) sa House of Blues sa Mandalay Bay Hotel sa Las Vegas.

Kini nga promosyon nagsilbing pagana sa labing gikaintapang engkuwentro nila ni pound-for-pound champion Filipino Manny Pacquiao ug WBO welterweight king Puerto Rican Miguel Cotto nga ipahigayon ugma sa GMG Grand Garden sa Las Vegas.

"The Manny Pacquiao Blog". Click here for stories and updates on the Filipino boxing champ.

Sa Las Vegas, naandan na gyud nga adunay promosyon nga ipahigayon nga magsilbing pagana, usa ka adlaw sa di pa ang usa ka dakong away.

Si Gorres (29-2-2, 15KOs) makigbatok kang Columbian Luiz Melendez (26-3-1, 21 KOs) sa usa ka 10-round super flyweight non-title bout.

Samtang si Melligen (16-1, 12KOs), kinsa usa ka potensyal nga welterweight, makigharong kang Mexican Michael Rosales (24-3, 21KOs) sa laing non-title bout.
Sila si Gorres ug Melligen parehong adunay kontrata sa promoter ni Pacquiao nga si Top Rank boss Bob Arum.

Ang laing mga Pinoy nga moaway sa samang promosyon mao sila si Frederico Catubay ug Fernando Montilla.

Si Catubay (25-15-3, 14KOs) makigbatok kang Mexican Alberto Rosas (30-5, 25KOs) alang sa IBF super flyweight eliminator samtang si Montilla (32-20-4, 22KOs) makigparang kang Jose Reynoso.

Sa interbyu sa fightnews.com, nagkanayon si Gorres nga importante gyud kaayo kining awaya gumikan kay mao kini ang magsilbing taytayan aron makakuha siya’g laing dakong away.

“Importante, importante talaga ito. This is a stepping stone siguro for my next fight. It will be a title fight,” matod ni Gorres.

Sa paggiya ni trainer Edito Villamor inabagan ni American trainer Freddie Roach, si Gorres naghinamhinam na gyud kabahin sa iyang purohan.

“I feel strong talaga and I know I’m going to win this match,” dugang sa Mandauehanon.

Ang away ni Gorres isalida ugma sa alas 9:00 ang takna sa ABS-CBN Channel 3.