GISUGDAN na sa duha ka mga opposition lider sa siyudad sa Sugbo ang ilang pagpangampanya.

Kagahapon, gisuroy nila ni Jonathan Guardo ug Lahug barangay kapitan Mary Ann delos Santos ang barangay Pasil.

Sun.Star accepts donations for victims of Typhoon Ondoy

Apan giklaro sa duha nga ang ilang pagpangampanya dili alang sa ilang paglansar sa umaabot 2010 election kon di sa ilang bag-ong gimugnang kawsa nga Our Cebu City.

Ang maong kawsa nagsalikway sa tradisyonal nga pamaagi sa politika pinaagi sa pagtanyag og “politics without borders.”

Kini nagpasabot nga ang gihiusa nila ang ilang mga programa ug plano alang sa usa ka siyudad ug wa gibase sa matag distrito.

Giklaro kagahapon ni Guardo ug delos Santos nga magpabilin ang ilang naunang plano nga molansar isip mga congressional aspirant sa north ug south district ug mga pagduda lang ang nanggawas nga sila ang magtandem isip mayor ug bise mayor.

Apan tungod sa ilang kawsa, makit-an gyud si delos Santos nga mosuroy sa mga barangay ubos sa south district sama sa iyang pagduaw kagahapon sa Pasil samtang si Guardo makita usab nga mosuroy sa north district ug gipaabot siyang mopatim-aw karong adlawa sa Lahug.

Si Pasil barangay kapitan Romeo Ocarol sa iyang bahin nagtuo nga ang daganan ni Guardo mao gyud ang pagka-kongresista maong bisan kon ilado siyang kaalyado sa negusyante, matod niini nga magpabilin ang iyang pagsuporta sa manok sa BOPK sa mayor ug bise mayor.

Gitubag usab sa duha ka mga opposition leader ang pagsaway ni Mayor Tomas Osmeña sa ilang mga credential nga matod pa di ikaparang nila ni Bise Mayor Michael Rama nga napiling presidente sa Vice Mayor’s League of the Phils. ug si Education consultant Joy Young, kinsa usa sa mga ten outstanding young men sa nasod.

Matod ni Guardo nga di kini angay ikapasigardo kay bisan kon wa pa siya makalingkod, daghan na siyang napatumang programa sa siyudad ug gani ang maong mga programa maoy gisundog sa siyudad.

“Mao siguro na ang ilang giingong experience nga nangopya ra sa atong mga programa,” nagkanayon si Guardo.

Samtang si delos Santos nipahinumdom nga usa sa iyang nadawat nga pasidungog hinatag mismo sa mayor isip usa sa mga outstanding public servant atol sa Charter Day celebration niadtong tuig 2004.