Guardo nagduda sa motibo; Osmeña wa manumbaling

Tuesday, February 9, 2010

MANINGUHA si negusyante Jonathan “Atan” Guardo nga mosaka og maayo ang ratings aron makapahimus ang mga Sugboanon sa dugang benepisyo nga ipanghatag ni Mayor Tomas Osmeña.

Namahayag niini si Guardo human si Osmeña nipahibawo sa iyang pagpanghatag og P10,000 ngadto sa matag tinun-an nga mograduwar karon sa hayskol. Dugang P10,000 ang ihatag kon gikan sa bukirang barangay ang tinun-an.

Have something to report? Tell us in text, photos or videos.

Click here for stories and updates on the Sinulog 2010 Festival.

Hinuon ang hatagan mao lang kadtong gikan sa pampublikong tunghaan.

Apan nagduda si Guardo sa motibo ni Osmeña kay tayming kini sa mga survey diin nagtabla sila bisan kon ang mayor maoy incumbent.

Si Osmeña wa matandog ning alegasyon ni Guardo.

“Tungod sa iyang pagkatarantar, gigamit na ni Mayor Osmeña ang tanang pundo sa kaban sa Sugbo aron mahatagan og gasa ang taga south district,” matod ni Guardo.

Nipasikad si Guardo sa iyang pamahayag ang paghatag ni Osmeña og dugang financial assistance sa senior citizens human masuta niini nga nagtabla na sila sa surveys.

Sila si Guardo ug Osmeña nag-atbang pagka kongresista sa south district sa dakbayan sa Sugbo.

Matod ni Guardo nga gisundog sab sa mayor ang iyang burial assistance ug pagpamutang og basketball boards sa mga barangay.

“Maningkamot ko nga magpadayon ko og usbaw sa surveys aron mas modaghan pa ang makadawat og hinabang, ilabina ang mga kabos,” dugang sa negusyante.

Sa samang higayon, iyang giawhag si Kugi Uswag Sugbo (Kusug) mayoral candidate Alvin Garcia sa pagpadayon sa paghatag og financial assistance ug scholarship sa mga tinun-an.

Di lang panahon nga mag-angat ang eleksyon, kon di sa unang adlaw sa iyang pangatungdanan kon modaog siya batok kang Bise-Mayor Michal Rama.

Samtang, si Osmeña, sa iyang bahin, niingon nga karon lang bag-o nga nakabaton og sobrang pundo ang Siyudad.

Siya niingon nga bisan unsa pay isulti ni Guardo, mohatag gyud siya agig pasalamat sa Sto. Niño sa iyang bag-ong kinabuhi human siya ma-diagnose og urinary bladder cancer.

“Sa utok ra na ni Guardo. Basta I’m doing this in honor of the Sto. Niño because he made me live. I will not disappoint (the Holy Child),” siya niingon.

Siya niingon nga ning tuiga, ang Siyuda gitakdang mokita og P5 bilyunes, nga maglakip sa gibana-banang surplus nga P2.3 bilyunes.

Mao ni ang hinungdan nga ang Siyudad sa paghatag og financial assistance, kay ang edukasyon maoy usa sa mga flagship program sa Siyudad. (REV/dugang taho ni RHM sa Sun. Star Cebu)