NIABOT na ang adlaw alang sa Dancesports Team Cebu City nga makahimo’g makasaysayang hitabo sa ilang pagsuway’g papatik sa Guinness World Records.

Karong hapon, kapin sa 7,000 ka mga mananayaw ang gamiton sa DTCC sa ilang pagsuway’g buak sa rekord nga Largest Dance Class in the World, nga kasamtangang gipanag-iya sa Budapest, Hungary gamit ang 2,229 ka mga mananayaw.

"Matod Pa Sa Lola ni Noy Kulas." Join the story-writing contest on Cebuano folklore and win prizes.
Nagkanayon si Cebu dancesports patron Edward Hayco nga nius-os og gamay ang ilang mga mananayaw gikan sa orihinal nga 8,000 kapin tungod kay kinahanglan nilang tangtangon ang katong maglisod pagkuha sa steppings.

“Naa gyud ta’y gipangtangtang, katong dili kaayo makahibalo sa sayaw. Wala lang gyud mi mokompiyansa kay kausa ra ni mahitabo, basin ma-disqualify ta kay importante man nga synchronize gyud ang dancers,” pasabot ni Hayco.

“Amoa na lang gipasabot katong mga nangatangtang. Pero bisa’g naa tay gipangkuha, daghan ra man gihapon kaayo ang atoa compare sa Budapest ,” dugang ni Hayco.

Karong ala 1:00 sa hapon mao ang rehistrasyon sa tanang mga mananayaw, mosunod ang opening program sa alas 3:00 unya ang pagsayaw ipahigayon karong alas 4:00.

“Ready na gyud mi. Dungan na ang atong dancers. Excited na kaayo mi,” matod ni Hayco.

Gitataw ni Hayco nga wala’y representante sa Guinness ang moabot aron pagsaksi sa kalihukan apan gimanduan sila nga sundon lang gyud ang saktong pagdokumentasyon.

Usa sa mga importante kaayo alang sa dokumentasyon mao ang pagkuha og mga saksi nga adunay saktong kredibilad.

Lakip sa mga gipangkuha sa DTCC nga mga saksi mao sila si Philippine Sports Commission (PSC) commissioner Fr. Vic Uy ug Cebu City mayor Tomas Osmena.