MASALIGON si Kongresista Eduardo Gullas nga mahisama sa pagpatigbabaw sa Korte Suprema sa cityhood sa Talisay ang kahimtang sa dakbayan sa Naga ug Carcar kon madesisyonan kini “in finality”.

“I never had any doubt regarding the outcome of Talisay. And it goes the same with Naga and Carcar,” nagkanayon si Kongresista Gullas.

Ang kongresista maoy nagpanday sa balaod aron mamahimong siyudad ang tulo ka dapit ug gipasidunggan siya nga amahan sa maong mga dapit.

Tungod sa technicality, ang Labawng Hukmanan nibasura sa petisyon with finality ni Cebu City Mayor Tomas Osmena nga on leave karon, nga ni kuwestyon sa legality sa RA 8979, ang Talisay City Charter.

Si Osmena nipetisyon nga usbon ang desisyon sa Court of Appeals nga nagdeklarar nga constitutional ang pagkahimong siyudad sa kanhi coastal town.

Ang dakbayan sa Sugbo niinsister nga ang Talisay nga nahimong component city sa Probinsya sa Sugbo niadtong 2001, napakyas sa pagkab-ot sa 150,000 nga population requirement tungod kay base sa 2000 report sa National Statistics Office duna lang kini 148,110 nga na census.

Sa bag-ong gipagawas nga desisyon sa Korte Suprema, kini nideklarar nga unconstitutional ang pagka siyudad sa 16 ka dapit apil na ang Naga ug Carcar tungod kay napakyas kini sa pagtuman sa mga gilatid nga requirements.

Ang desisyon nga giluwatan ni Associate Justice Antonio Carpio nagkanayon nga ang 16 ka lungsod nga nahimong mga component cities di makapangangkon nga exempted sa RA 9009 nga ni epikto niadtong 2001.

Ang RA 9009 nga gipangamahan ni Senador Aquilino Pimentel niusab sa Section 450 sa Local Government Code nga nagpasaka sa annual local income requirements alang sa usa ka lungsod aron mahimong siyudad gikan sa P20 milyunes ngadto na sa P100 milyunes. (VLM)