Gwen artista sa indie film

Monday, March 22, 2010

GOBERNADOR Gwen Garcia mahimo nang artista human niya dawata ang tanyag sa usa ka independent producer nga himuon siyang usa sa mga cast sa iyang international nga pelikulang pagahimuon dinhi sa Sugbo.

Usa ka sikat nga director ug mga artistra gikan sa gawas ang ikauban sa gobernador sa pelikula kalabot sa kinabuhi sa mga binilanggong nausab ang kinabuhi ngadto na sa maayo.

Have something to report? Tell us in text, photos or videos.

Lakip sa artista sa maong pelikula mao ang usa sa sikat nga matinee idol nga si Dingdong Dantes ug ang aktor nga si Ricky Davao.

Click here for Election 2010 updates

Matod ni Garcia nga iyang gidawat ang maong tanyag tungod kay makatabang kini sa pag-promote sa Sugbo ngadto sa laing kanasuran kay ang maong pelikula adto ipasalida sa gawas sa nasod.

Ang shooting nagsugod na ug molanat og usa ka semana, apan ilang gipaningkamutan nga kini matapos sa mubo nga panahon.

Bisan pa man sa ka busy sa schedule sa gobernador, iya kining himuon ug ilakip sa iyang mga gimbuhaton isip gobernador.

Ang iyang papel sa pelikula isip usa usab ka gobernador.

“Og di pa lang ni para sa Cebu, dili ko ni buhaton. It will promote Cebu ug mahibaw-an sa tibuok kalibutan nga mao ni ang atong gibuhat aron ma-transform ang usa ka bilanggoan,” matod sa gobernador.

Lakip sa makaapil sa salida mao ang mga dancing inmate sa Cebu Provincial Detrention and Rehabilitation Center (CPDRC) sa Brgy. Kalunasan.

Apan gitataw sa gobernador nga ang estorya wa motutok lang sa dancing inmates sa CPDRC, apan ang uban pang kalampusan nga sa mga binilanggo sulod sa Provincial Jail.

“Ang estorya kabahin sa kausaban sa usa ka binilanggo ug ang maayong pagdumala sa gobyerno. Hinungdan nga naangkon sa mga binilanggo ang kausaban sa ilang pagka tawo ug angay nga kapanaminan sa uban,” matod sa gobernador. Ang gobernador wa magpabayad sa producer isip talent fee, ingon man usab ang mga binilanggo sa CPDRC nga apil unya sa maong pelikula.

Paningkamotan sa gobernador nga maayo ang iyang pag-arte kay ang role nga iyang huptan sa pelikula usa man ka gobernador.