HEADQUARTER sa Lakas-Kampi CMD ug One Cebu sa lungsod sa Santa Fe girakrarakan sa duha ka armadong mga tawo nga sakay sa usa ka motorsiklong puwa alas 12:40 kagahapon sa kaadlawon sa barangay Talisay.
Ang maong pagpangrakrak maoy ikalima karong tuiga sa 4th district samtang nagkaduol ang automated elections karong Mayo 10.
Upat ka mga insedenti sa pagpangrakrak sa dakbayan sa Bogo, karong buwana: Abril 6, balay sa barangay treasurer sa Malingin; Abril 10, balay sa barangay tanod sa Banban, ug laing balay sa usa ka civilian sa barangay Cayam; ug ang labing uwahi ang chief tanod sa barangay Banban niadtong Abril 22.
Kahinumduman nga si kanhi mayor Rogelio “Dokdok” Illustrisimo Sr. sa lungsud sa Sta. Fe gipusil patay sa gawas nga buhatan sa Commission on Elections sa lalawigan niadtong 2007.
Si Sr. Insp. Leoncio Baliguat Jr., hepe sa Sta. Fe Police Station, nagkanayon nga ang headquarters ni mayoral candidate Adoracion Cabrera sa Lakas-Kampi-CMD girakrakan.
Maayong pagkabuslot sa billboards nga gibutangan sa poster nila ni Gobernador Gwendolyn Garcia ug Benhur Salimbangon.
Matod ni Baliguat nga sa wa pa ang pagpangrakrak gikataho nga ang mga gunman nakit-an pang nagpaatbang sa headquarters ug pipila gutlo ang nakalabay kalit lang namusil.
Hinuon way nangaangol sa insedenti diin dunay mga 10 ka tawo nga supporters ni Cabrera nga didto sa lugar nga padulong na mangatulog.
Dali kaayong nakasibat ang mga gunman nga wa makuha ang plate number sa motorsiklo. Nakuha sa kapulisan sa crime scene ang tulo ka kabhang sa 9mm, usa ka slug niini.
Usa ka Ely Senangote nagpailang political consultant ni kongresista Salimbangon ang nagpa-blotter sa maong insedenti ug nipahibawo nga siya maoy target sa mga suspek.
Si Senangote nitug-an sa mga police nga niadtong Abril 21 sa alas 5 sa hapon nakadawat siyag text message gikan sa usa ka Tagalog nga nipadayag nga dunay mahitabo kaniya. “Pare paghindi ka aalis nang Sta Fe patay ka. Itutumba ka namin” sumala pa sa maong tawo nga nipadala sa text message.
Nunut sa maong insedenti, ang pangulo sa kapulisan sa lalawigan sa Sugbu Sr. Supt. Erson Digal nimando gilayon kang Baliguat nga mopahigayon og mas lawom nga imbestigasyon aron mailhin ang mga naghimo niini.
Si Digal nga gikahinabi sa Sun.Star Superbalita nipadayag nga mahulagway nga usa lang ka harassment lang ang insidente nga gihimong pagpanghulga sama sa ubang nahitabo diha sa 4th district.
Apan bisan pa niini kagahapon sa hapon iyang gipadala ang usa ka ka team sa regional mobile group (RMG-7) didto sa Sta. Fe ug laing usa ka team niini sa Madridejos nga nakabase sa Bogo. (Guam P. Logroño-Correspondent)