SI Sr. Supt. Erson Digal, direktor sa Cebu Provincial Police Office (CPPO), nisaad nga mohimo og lakang karon sa pag-imbestigar kang Inps. Audie Pelayo, hepe sa Samboan, kinsa gikatahong nagmaoy ug nakig-sukmagay sa iyang sakop niadtong Sabado sa hapon.
Gikataho nga naguba ang patrol car nga resulta sa away nga giingong tungod sa wa magkasinabot sa bahin sa tigbakayan.
Si Digal, nahinabi sa Sun.Star Superbalita ug dySS Super Radio, nagkanayon nga palagputon gyud niya si Insp. Pelayo diha sa Samboan ug mag-atubang og imbestigasyon.
Matod ni Digal nga nangahadlok na karon ang mga sakop ni Insp. Pelayo ug wa nay motestigos sa insedente hinungdan nga iyang gimanduan si Sr. Insp. Ruben Cuizon ang hepe sa Provincial Investigation ang Detective Management Branch (PIDMB) sa pagpalawom pa sa imbestigasyon.
Gipadayag niini nga nagtuo siyang nahadlok lang gyud mosulti ang ubang mga police ug bisan paman gipadala niya si Sr. Insp. Cuizon iyaha gihapong istroyahon unya ang mga nahimtungdang police nga gi-report nga nagsinukmagay.
"Alangan og akong baby-hon, di ni siya angayang mag-opisyal kon ingon ana ang iyang kinaiya, gipakatulog siya sa iyang mga sakop he will suffer the consequences sa iyang gipakitang maayong maayong laki" sumala ni Digal. (Guam P. Logroño)