High school MVP na-ospital

Saturday, March 20, 2010

Mga duwa karon
1:00 pm- PTT/UV batok Bibbo/CIT (jrs)
2:30 pm- Ave Maria/USJ-R batok Enervon/UC (jrs.)
4:00 pm- San Marino/USC batok PTT/UV (srs.)
5:30 pm- Ave Maria/USJ-R batok USPF o UC (srs)

DOBLENG blackeye ang naangkon sa Bibbo Hotdog/CIT Wildkittens sa ilang 71-86 nga kapildihan batok sa PTT Fuel/University of the Visayas (UV) Baby Green Lancers sa Game 1 sa ilang juniors division best-of-three semi-finals series kagahapon sa Cesafi-sanctioned 2010 Partner’s Cup sa Cebu Colisuem.

Have something to report? Tell us in text, photos or videos.

Click here for Election 2010 updates

Ang Wildkittens, kampiyon sa 2009 Cebu Schools Athletic Foundation Inc. (CESAFI) high school division, nawad-an pa gyud og labing sinaligan gawas sa ilang dakong kapildihan.

Gitumbok nga sinaligan sa Wildkittens mao si JR. NBA MVP Jayven Mark Tallo, kinsa nakuyapan sa sayong bahin sa 4th quarter.

Nasayran nga ang kasamtangang Cesafi high school MVP adunay gamayng hilanat sa wala pa ang kombati apan nipugos gyud kini’g duwa sa tinguha nga makatabang sa iyang puwersa.

Bisan adunay gipamati sa lawas, nakatigom og walo ka puntos si Tallo sa 2nd quarter aron tabangan ang Wildkittens nga makaposte og 40-29 nga labaw sa halftime.

Sa tibuok 3rd quarter, nagpahuway ra si Tallo tungod sa barangayan system nga gisubay sa liga ug hinayhinayng nakagukod ang Baby Green Lancers.

Sa pagbalik og duwa ni Tallo, hayan kalit lang siyang nawad-an sa panimuot sa 8:39 minutos sa 4th quarter. Gituohan nga sobrang kaluya ug dehydration ang hinungdan.

Gisakay si Tallo sa stretcher ug daling gidala sa Chong Hua Hospital. Ning pagsuwat, wala pa masayri kon unsa na’y kahimtang ni Tallo.

Sa laing juniors semi-finals, giangkon ni Jerei Pingoy ang 11 sa katapusang 13 ka puntos sa Enervon C/UC Webmasters sa ilang 94-84 nga kadaugan batok sa Ave Maria Sanctuary Park/USJ-R Baby Jaguars sa Game sa ilang kaugalingong series.