Igsuon sa konsehal gidakop

Wednesday, March 17, 2010

IGSUON sa konsehal sa siyudad sa Talisay kinsa gitumbok nga maoy supplier og shabu sa lalawigan sa Negros ug Leyte nasikop sa buy-bust operation sa kapulisan.

Nakuhaan siya og dakong bulto sa shabu.

Have something to report? Tell us in text, photos or videos.

Click here for Election 2010 updates

Ang kapulisan nitumbok sa gikatahapan nga maoy nag-finance sa kandidatora sa iyang igsuon nga naglingkod karon isip konsehal sa siyudad sa Talisay.

Apan ang iyang igsuong konsehal igo lang nikatawa ug nihimakak sa pasangil.

Ang suspek giila sa kapulisan nga si Hermigildo Capala, alyas Dodong Capala, 60, minyo, taga barangay Cansojong, Talisay, igsuon ni Konsehal Aaron Capala, kinsa nagpasubli sa eleksyon sa Mayo.

Nasayran kagahapon sa kadlawon ang Regional Anti Illegal Drugs Special Operations Task Group pinangulohan ni Insp. Glenn Hife ug mga kauban nipahigayon og buy-bust operation batok kang Capala.

Ang transaksyon didto gipahigayon sa usa ka buwangan sa barangay Poblacion, siyudad sa Carcar tungod kay nisalmot man ang gikatahapan og derby sa dapit.

Sa dihang nahatag na ang usa ka bulto sa shabu nga mokantidad og P150, 000 dali kining nasikop.

Matod ni Hife nga duha sila ka buwan nga nagsunod sa mga kalihukan ni Capala.

Sigun sa ilang nasayran daghan kinig mga balay sa Dalaguete, Minglanilla ug Talisay city.

Gani si Capala maoy numero uno sa ilang listahan sa order of battle niadto pang 2005.

Siya maoy giilang lider sa grupo nga mamaligyag shabu dinhi, ilabi na sa dakbayan sa Sugbo.

Samtang ang iyang operation miabot na sa lalawigan sa Negros ug Leyte tungod kay makahalin naman siyag usa ka usa ka kilong shabu matag semana.

Gibutyag ni Hife nga si Capala maoy nag-finance sa kandidatora sa iyang maguwang nga Talisay city councilor. Posebling mao usab kini ang mo-finance sa subli niining pagpapili, matod ni Hife.

Hinuon daling gihimakak ni Hermigildo ang tanang pamasangil.

“Kana akong maguwang (Aaron), ang tulo ka anak ana toa sa gawas.

Wala sab ko mohatag (kuwarta) ana. Tabang lang kog kampanya pero wala ko mohatag. Unsa man say akong ihatag intawon wala man koy kuwarta,”asoy ni Capala nga nahinabi sa Sun.Star Superbalita.

Hinuon iyang gibutyag nga ang iyang usa ka anak anaa nagtrabaho sa Talisay City Hall, samtang ang iyang pag-umangkon anaa nagtrabaho sa Kapitolyo.

Si Konsehal Aaron nga gi-interview sa Sun.Star Superbalita niingon sab nga bisan makausa wa gyud makahatag og kuwarta ang iyang igsuon kaniya.

Iya sab nga gipanalipdan ang iyang manghod.

Matod niya nga human maronda ang iyang igsuon niadtong 1982 tungod sa pagpamaligyag, marijuana, wa na gyud kini malambigit pa sa ginadiling drugas.