GIPANGSILUTAN sa Commissioner’s Office sila si Danny Ildefonso ug Marc Pingris sa San Miguel Beermen gumikan sa ilang pagkahilambigit sa kasamok kontra sa usa ka dumadapig sa Brgy. Ginebra Gin Kings sa Game 2 sa PBA Fiesta Conference finals niadtong Miyerkules sa Araneta Coliseum.

Sa maong duwa, gitabla sa Beermen ang best-of-seven series, 1-1, pinaagi sa 95-78 nga kadaugan.

For updates from around the country, follow Sun.Star on Twitter

Apan sa wa damha pagkahuman gyud sa panagsangka, nakig-away sila si Pingris ug Ildefonso sa usa ka dumadapig sa Gin Kings.

Niaksyon og asdang sila si Pingris ug Ildefonso ang maong dumadapig, hinuon nasanta ra sila sa mga opisyal.

Ang maong dumadapig gi­pagawas dayon sa mga awtoridad sa venue.

Si Ildefonso, kinsa maoy unang miatak sa dumadapig, gisuspenso og usa ka duwa unya gipamulta og P30,000 samtang si Pingris kinsa milaban kang Ildefonso, gipamulta og P10,000.

Sa ilang pagpakighinabi kang commissioner Sonny Barrios, nangayo og pasaylo sila si Ildefonso ug Pingris sa ilang nabuhat hilabi na ngadto sa dumadapig nga ilang nakontra.

Gipasabot sa duha nga nadala lang sila sa grabeng emosyon maong ilaha katong nahimo.

Sa laing bahin, buakon Beermen ug Gin Kings ang ilang panagtabla sa ilang panagharong og balik karong gabii sa Game 3.

Ang Beermen mokombati nga wala si Ildefonso hinungdan nga pabor og gamay ang Gin Kings.

Sa lain pa gyung bahin, gisakmit ni Jayjay Helterbrand sa Gin Kings ang ikaduha niyang Best Player of the Conference award.

Iyang gilupig ang higpit niyang karibal sa maong pasidungog nga sila si Arwind Santos sa Burger King ug Hontiveros.

Si Gabe Freeman sa Beermen mao ang napiling Best Import. (PBA Media Bureau)