Inahan dunggabon unta sa anak, mikuha

Sunday, September 5, 2010

NISUWAYAN sa pagdunggab sa anak ang iyang kaugalingong inahan human nasuko kining iyang gibuyag dihang sa pagluto niya og itlog.

Si George Caayon, 30, ulitawo ug molupyo sa Ponce Capitol Hills, Barangay Capitol Site, Cebu City, nag-atubang sa kasong parricide dihang gisuwayan niya sa pagdunggab ang iyang inahan nga si Necitas Caayon, 54, niadtong Septiyembre 1 sa hapon.

Have something to report? Tell us in text, photos or videos.

Hinuon, mamahimong temporaryong gawasnon si George ning iyang giatubang nga kaso kay nirekomendar ang Cebu City Prosecutor’s Office nga makapiyansa siya sa kantidad nga P24,000.

Nisaysay si Necitas nga samtang nagluto siyag utan kalit nga gilunod ni George ang tulo ka mga itlog sa iyang gilutoan.

Gibuyag niya ang iyang anak nga di una ilunod ang itlog sa iyang gilutoan kay wa pa kini mahugasi apan nasuko hinuon kini ug nikuhag kutsilyo ug nagkanayon, “Maka-ihaw na gyud ko og tawo,” hinungdan nga nidagan siya palayon sa ilang kusina.

Pipila ka minutos, nibalik siya sa ilang balay uban sa paglaum nga nilakaw na si George apan diha ra diay kini unya giingnan siya nga “niuli diay ka” dayong gunit sa kutsilyo ug gidunggab siya apan nakadagan siya.

Nidagan siya paingon sa barangay hall sa Capitol Site unya iyang gitaho kang Capitol Site Barangay Councilor Francisco Alburo ug nirespondi gilayon kini uban si Barangay Tanod Eduardo Ventura.

Ang sunod nga nahitabo gipahibawo siya nga gisikop na ang iyang anak ug gidala sa Fuente Police Station ug gidala gilayon niya ang kutsilyon nga maoy gigamita sa iyang anak sa pagdunggab kaniya.

Iyang gihangyo ang kapulisan nga prisohon ang iyang anak ug pasakahan nig kaso nunot sa pagsuway niyag kutlo sa iyang kinabuhi. (JECT)