Mga duwa karon (USC main-gym)
12:30 pm Hapee On-line batok USC Jrs.
2:30 pm Japan batok Chinese Taipei - 3rd place
4:30 pm RP batok Iran - Championship
 
NAGHURAMENTADO nga mibagnos og maayo si Kiefer Isaac Ravena ug nipupo’g 29 puntos, 16 niini sa second half, aron ituboy ngadto sa kulbahinam  nga kadaugan ang RP team batok sa bisitang Islamic Republic (IR) Iran, 89-83, kagabii sa katapusang duwa sa elimination sa Nokia Pilipinas 2nd Youth Invitational Basketball Championship under 16 years old sa University of San Carlos gym, Sanciangko st., dakbayan sa Sugbo.

Sun.Star accepts donations for victims of Typhoon Ondoy

Sayong nanginit ang mga Pinoy’ng basketbolista nga gidumala ni coach Eric Altamirano diin mitali kini sa 27-21, paghuman sa 1st quarter.

Apan gamit ang gitas-on, ang mga Iranian nationals ni coach Abolghasem Kiyani daling mi-angkla sa mga Pinoy pinaagi sa pagpabuto og 21-2 nga rally sa second period.

Daw sa nagkatibuagsa og kadiyot sa Team Pilipinas kinsa igo lang mipuga og singko puntos niadtong higayona. Nitapos ang first half, 48-32, pabor sa Iranian.

Sa pagsugod sa second half, daw sa nausab ang momentum sa duwa sa dihang mipahamtang og trapping defense ang Team Pilipinas inubanan sa malanog nga pag-abiba sa dumadapig niini.

Daling mihimo o mga adjustments sa depensa ang kanhi coach sa Purefood nga si Altamirano ug mibunlot sa anak ni ex-PBA Bong Ravena nga si Kiefer nga maayo usab kaayong nakatimon sa duwa hinungdan nga nakatabla 57-57 sa 1:54 sa ikatulong quarter.

Nisamot kahait ang opensa sa mga Pinoy sa ikaupat nga period dihang nanginit si Cris Michael Tolomia, manghod ni ex-PBA player Chester Tolomia ug mitabla sa score, 64-64, 9:05 segundos ang nahabilin sa duwa.

Gawas nilang Tolomia ug Ravena, miabag usab si Jeoffrey Javillonar, Alolino ug Ferrer.

Si PSC Commissioner Fr. Vic Uy SVD nga nisaksi sa duwa, daw sa di katuo sa iyang nakita sa kaisog sa mga sakop sa RP team.

“Wala ko mag expect makadaug ta gumikan sa katag-as sa Iran, ug I’m very happpy that we won, and we should win tomorrow (karon), I think we have the advantage gumikan sa kadaugan nato batok nila,” batbat ni Fr. Uy.

Ang duwa kagabii tali sa RP ug Iran gitambungan usab ni Smart Gilas-RP team coach Rajko Toroman, SBP Exec. director Noli Eala, mga opisyal sa Nokia ug mga opisyal ug miyembro sa Rotary Club ug Cebu Fuente (RCCF) pinangulohan ni Rady Abarintos.

Sa unang duwa kagabii midaug ang Japan kontra Chinese Taipei, 72-68, apan karong gabii magtakos ang duha ka koponan sa alas 2:30 sa hapon alang sa 3rd place, sunod sa preliminary games sa Hapee On-line kontra USC Jrs. samtang magsangka og balik ang Team Pilipinas ug Iran alang sa championship game

Mga puntos:

RP (89) - Ravena 29, Tolomia 17, Alolino 7, Ferrer 7, Javillonar 6, Romero 5, Pate 5, Bantayan 5, Pessumal 4, Labing Isa 3, Teng 1.

Iran (83) - Yousefi 21, MirFattahi 15, Sedighi 14, Monji 13, Zangeneh 7, Mashayekhi 7, Faghihparvar 4, Khademnamdari 2.