Jailguard gipuli og priso

JAILGUARD sa Lapu-Lapu City Police Office (LLCPO) detention cell gibalhog sa selda nga iyang gibantayan human moeskapo ang piniriso nga iyang gikuyogan sa korte.

Ang hepe sa LLCPO PSSupt. Mariano Natuel Jr., nimando sa pagpabalhog sa iyang jailguard nga si P02 Cirilo Lagumbay sukad kagahapon sa mga alas 8:00 sa buntag.

Napungot si Natuel sa pagka-eskapo sa lain na usab nga piniriso niadtong Miyerkules sa alas 3:00 sa hapon sa dihang gidala ni Lagumbay ang detainee nga si Miguel Manlapas, alyas Ege, 32.

Nasayran nga gidala sa Hall of Justice ni Lagumbay nga si Manlapas aron ka-isyuhan og commitment order ug madala na sa City Jail uban sa laing priniriso nga babaye, kinsa nga moatubang usab sa huwes aron mopiyansa.

Giingong nihangyo si Manlapas kang Lagumbay nga mosud sa usa sa mga pansayan sa korte sanglit naglain ang iyang tiyan ug aron sa pagtuman sa sugo sa lawas.

Nipasabot si Lagumbay ngadto sa mga tigbalita nga iyang gitangtangan sa pusas si Manlapas samtang anaa na sud sa cubicle.

Samtang gibiyaan una sa jailguard ang binilanggo sanglit gipatawag siya sud sa korte nga magsilbi nga witness niadtong laing priniriso nga iyang gikuyogan aron mopiyansa sa iyang kaso.

"Ako pud nga gisigihan siya (Manlapas) og lili diha sa may pultahan kay makita ra man kay aduna may bildo. Wa nako kabantay nga nakagawas," pulong pa ni Lagumbay.

Gituohan nga diha ra usab miagi sa pultahan si Manlapas ug wa mamatnguni sa dihang gihubo ang yellow t-shirt nga adunay marka nga detainee ug nisul-ob sa laing t-shirt nga maoy gigamit niini sa pagpurong sa iyang ulo.

Si Manlapas, lumad nga taga-Zamboanga del Sur ug kasamtangan nga nagpuyo sa barangay Canjulao, Lapu-Lapu city, nasikop niadtong Sabado sa Theft and Robbery Section gumikan sa kasong illegal possession of firearm.

Siya suspek usab sa sunod-sunod nga mga pagpanulis sakay sa motorsiklo.

Nakuha diha sa posisyon ni Manlapas ang tulo ka mga laptop, duha ka cellular phone, portable play station (PSP) ug video camcorder.

Atol niining pagsuwat padayon nga gipangita sa kapulisan si Manlapas.

Dugang pa ni Natuel nga kalapasan sa Article 224 sa Revised Penal Code o evation through negligence.

Kahihumduman nga ikaduha na kini nga kaso sa pag-eskapo sa binilanggo diha sa detention cell sa LLCPO.

Niadto lang Mayo 16 gigabas sa binilanggo nga si Joshua Sayson sud lang walo ka minutos ang rehas dihang nigawas ang jailguard aron sa pagtuman sa sugo sa lawas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph