Kahibulongang Hitabo: Kadtong tingog diha sa blackboard

Tuesday, September 7, 2010

Carmelo D. Lariosa
Panadtaran, San Fernando, Cebu

BAG-ONG magtutudlo si Jasmin sa Ilang-ilang Elementary School.

Have something to report? Tell us in text, photos or videos.

Karong adlawa mao ang iyang unang adlaw sa pagtudlo dinhi. Kay matahom man si Jasmin natural nga bation pod og kaibog ang duha niya ka mga kaubang magtutudlo nga sila si Sir Roberto ug si Sir Efren.

Ang eskuylahan nahimutang sa bukirang balangay sa San Agustin nga sakop sa lungsod sa Dimasalang. Taudtaod na kining natukod ug matod pa sa sugid, namatyan kuno kini og usa ka lalakeng magtutudlo kay naghikog sa punoan sa tugas.

Updates on President Benigno Aquino III's presidency

Grade one ang gitudloan ni Jasmin. Sa una niyang semana dinhi may namatikdan siyang morag makapahibulong kaayo kaniya.

Matag buntag inig-abot niya sa iyang classroom maoy mosugat ang usa ka dakong buyog nga magsakdap-sakdap. Iya kining gipasagdan apan ingon sa buot motugpa sa iyang lamesa. Apan kon magsingabot na ang iyang mga ‘pupil’ kalit lang pod nga magpahilayo ang buyog.

“Okey ka lang dinhi sa bag-o mong assignment, Ma’am Jas?” ni Efren nga mianha kadiyot sa iyang classroom.

“Okey man, Sir, uy!” tubag ni Jasmin. Unya wala niya tuyoang nahalingi sa usa ka dakong punoan sa narra ug ingon sa nanglimbawot ang iyang balhibo.

“Karaan na kanang maong kahoy, Ma’am Jas,” ni Efren nga nakabantay nga didto magtutok si Jasmin sa kahoy. Unya mibiya kini human mananghid.

Gisugdan ni Jasmin ang iyang klase. Behave kaayo ang mga bata.

Samtang siya nagsulat sa blackboard kalit siyang napahunong.

Duna siyay nabati nga tingog nga morag naghunghong. Matod sa tingog, “I love you, Jasminnn… I love youuuuu! I want you to be my lady…!” Unya nahanaw lang og kalit ang tingog nga daw gidala sa hangin. Gikulbaan siya apan wala siya magpasabot sa mga bata aron di sila mangahadlok.

Pagkaingon ugma sa iya nang pagpaniudto kay nagbawon man siya, nakurat siya sa iyang nakita diha sa iyang lamesa kay may gibutang mgan nga mga lamiang pagkaon ug mga prutas. Kinsa kahay nagbutang ini dinhi? Nakapangutana siya sa iyang kaugalingon.

Midali siyag balhin ngadto sa lawak ni Mrs. Cornas, teacher in charge sa Grade six ug didto mokaon. Wala niya sultihi ang hamtong maestra sa iyang nakita.

Sa iyang pagbalik sa iyang lawak wala na didto ang mga pagkaon.

Gipangutana ni Jasmin ang mga bata kon nakakita ba silag pagkaon sa lamesa, apan hugot nga mibalibad ang mga bata nga wa sila makakita.

Dihang nanglakaw na ang iyang mga tinun-an ug siya na lang usa sa iyang classroom, nahaigking siya sa iyang nakita kay may nagsulat sa blackboard gamit ang ‘chalk.’ Dili makita ang kamot nga nagsuwat. Gibasa niya ang gisuwat, “Jasmin, mahal ko ikaw. Busa mahala usab ko sama sa pagmahal ko kanimo!”

Wa na makaagwanta si Jasmin. Iyang gisulti kang Mrs. Cornas ug sa prinsipal ang nahitabo kaniya. Gibati usab og kahadlok ang duha ka maestra.

Pagkasunod adlaw nagdala silag pari aron benditahan ang lawak-saringan ni Jasmin. Sa pagsablig sa pari sa tubig nga beninditahan, midilaab pagkalit ang classroom ug hapit tilapi sa kalayo si Jasmin ug ang mga maestro ug maestra. Nanagan sila. Naugdaw ang classroom, apan ang blackboard wa masunog ug may mga pulong nakasulat: “Jasmin, ang nagdilaab nga kalayo mao ang kainit sa gugma ko kanimo!”

Unya kalit may usa ka buyog nga nagsakdap-sakdap kang Jasmin ug dayon milupad kini paingon sa dako ug karaang kahoy nga narra.

Pagkaugma wala na mobalik si Jasmin sa Ilang-ilang Elementary School. (KATAPUSAN)