GIINGONG tungod sa nabiyaan nga kandila ang hinungdan sa pag-ulbo sa kalayo nga mi-ugdaw og duha ka mga panimalay kagahapon mga alas 5:06 sa buntag sa Zone-8, Cugman, dakbayan sa Cagayan de Oro.
Nagsumikad ang kalayo sa panimalay ni Antonio Pasko ug daling mikaylap sa silingang panimalay nga gipanag-iyahan sa nailang si Robena.
Sa inisiyal nga imbestigasiyon sa Bureau of Fire and Protection (BFP)-Northern Mindanao, gikabutyag nga 5:06 sa buntag, Miyerkules, nagsugod ang pag-ulbo sa kalayo nga milamoy sa duha ka mga panimalay.
Natalang nakontrol na kini mga alas 5:29 ug gideklarang fire-out mga alas 5:43 sa buntag human usab sa ubay-ubay ka mga fire-truck nga miresponde atol sa maong sunog.
Nasayran nga taod-taod na nga walay kuryente ang balay gumikan kay naputlan kini ug kandila lamang ang ginagamit o lampara.
Giingong atol sa panghitabo mga alas kwatro sa kaadlawon, nagsindi ang igsoon ni Pasko og kandila aron manikaysikay kay mosayo sa trabaho ug nabiyaan matud pa ang maong kandila hinungdan sa maong kalit nga pag-ulbo sa kalayo.
Swerteng wala’y natalang naangol atol sa nahitabong sunog gawas lamang sa pagkaugdaw sa duha ka balay diin adunay natalang damyos nga moaabot sa P200 mil kapin kon kulang.
Sa pagkakaron, padayon pa nga giimbestigahan sa tinugyanan sa BFP ang insidente aron matumbok ang tinuod nga hinungdan sa pag-ulbo sa kalayo samtang padayon sila nga nagpahimangno nga magbinantayon aron nga malikay sa mga susama niini nga panghitabo.