`Killers’ mipasiatab, nasikop

Tuesday, March 9, 2010

NANGHAMBOG maoy hinungdan nga nailhan ug nasikop sa kapulisan ang tulo ka batan-ong mga lalake nga suspek sa pagtulis ug pagpatay sa usa ka sakristan niadtong Dominggo sa sityo Banawa, Barangay Guadalupe, siyudad sa Sugbo.

Nabawi sa kapulisan ang gubaon nga cell phone sa biktima, lakip na ang armas nga gigamit sa pagpatay ug ang motorsiklo nga gisakyan sa mga suspek.

Have something to report? Tell us in text, photos or videos.

"The Manny Pacquiao Blog". Click here for stories and updates on the Filipino boxing champ.

Ang gunman niangkon nga iyang gipusil si Carlo Mangitngit, apan aksidente lang kadto.

Samtang si Cebu City Police Director Sr. Supt. Patrocinio Comendador wa gyud motuo nga way tumong sa pagpusil ang mga suspek.

Ang mga suspek mao sila si Joypher Tatoy, alias Ipyot, 27, Marvin Sanchez, 26, pulos taga sityo Gun Club, Banawa ug si MJ, 16, taga Mc Arthur Boulevard, siyudad sa Sugbo.
Si Tatoy maoy nipusil kang Mangitngit samtang si Sanchez maoy nikuha sa cell phone sa biktima, samtang si MJ maoy nagmaniho sa usa ka Max II motorcycle (plate number YL-4926).

Ningsikop sa mga suspek mao ang mga sakop sa Criminal Investigation and Intelligence Branch (CIIB) Guadalupe Police pinangulohan nila ni Chief Inspector Mario Monilar ug Chief Insp. George Ylanan.

Sa taho nga nasyaran sa SunStar Superbalita nagkanayon nga nga ang mga suspek, human gitulis ug gipusil si Mangitngit nagbagolbol ug nanghambog sa ilang mga kaila nga sila nakatulis ug nakapusil og usa ka batan-on nga nagdala og baratohon nga cell phone nga way key pad ug gigamitan lang og tukog para tuslok.

Ang impormasyon nakuha sa kapulisan mao nga ilang gihimo ang follow-up operation.

Una nilang nasikop si Sanchez pasado alas 10 sa milabayng gabii sa ilang lugar.

Si Sanchez ang nitudlo kang Tatoy nga maoy gunman ug nabawi ang armas nga snubnose caliber .38 revolver nga may usa ka kabhang ug pito ka mga bala.

Ang cell phone sa biktima nga giprenda sa silingan sa kantidad nga P300 ilang nabawi.

Gironda dayon sa kapolisan ang balay ni Tatoy, apan wa kini sa ilang balay.

Nakadawat sila og impormasyon nga niadto kini sa Sityo Dunggoan, Barangay Perelos, siyudad sa Carcar nianang kaadlawon.

Si MJ nga gipangita sa kapulisan nitahan uban sa iyang amahan nianang pasado alas 4 sa kadlawon.

Si Tatoy nga unang nahinabi sa mga tigbalita niingon nga wa siyay tuyo nga pusilon ang biktima, apan kalit kining nakabuto.

“Ako ra man tong gition unya nakablitan man nako. Mao to mibuto. Wa man miy plano pagpusil,” pasabot sa suspek.

Apan si Comendador niingon nga lusot na lang kini ni Tatoy aron moubos ang kasong murder ngadto sa homicide nga ipasaka batok kanila.

“Kana kay nagdala na sila og armas, naa gyud na silay intensyon sa pagpusil. Nakainom pa gyud sila,” pasabot ni Comendador.

Si MJ nga maoy nagmaniho sa motorsiklo nagkanayon nga gidool siya nila ni Sanchez ug Tatoy kay adunay adtuon sa usa ka lugar.

Kalit siyang gipahunong ni Tatoy ug iyang nadungog ang buto sa armas de fuego ug dayon dali silang nanibat.