Komisyon nagsugod na og susi sa `Rain Dance 2010’ sa Carmen

Friday, March 12, 2010

PROVINCIAL Women’s Commission nagsugod na sa ilang imbestigasyon sa gipahigayon nga “Rain Dance 2010” sa lungsod sa Carmen, Sugbo.

Kon mamatud-an nga may kalapasan sa Women’s Code, hayan mag-atubang og kaso ang mayor.

Have something to report? Tell us in text, photos or videos.

"The Manny Pacquiao Blog". Click here for stories and updates on the Filipino boxing champ.

Usa ka komitiba ang gitukod ni Bokal Agnes Magpale nga maoy chairperson sa Women’s Commission.

Ang komitiba gilangkuban og usa ka abogado ug upat ka mga sakop niini ug nibisita sa lungsod aron sa paghimo og imbestigasyon.

Matod ni Magpale nga ilang gikuhaan og testimoniya sila si Konsehal Imelda Seno ug uban pa nga mga konsehal sa lungsod.

Lakip sa imbestigahon si Mayor Sonia Pua, gitumbok nga maoy nagpasiugda sa maong kalihukan.

Gipahibawo usab ni Magpale nga nakakuha na sila og kopya sa maong kalingawan kay nakuhaan kini og video tape gikan sa usa ka cable television nga nagbase sa siyudad sa Danao.

Sa interbyu sa Sun.Star Superbalita nanghimakak ang mayor nga bastos ang maong kalingawan.

Apan ilang tan-awon ang maong salida aron maklaro kon kini nakalapas ba sa Women’s Code, matod ni Magpale.

Gikwestyon usab ni Magpale kon nganong bas-on og tubig o beer ang lawas sa usa ka babaye nga nagsayaw atubangan sa kalakin-an nga ningsalmot sa kalingawan.

Sa sayo pa, ang konseho sa lungsod nipasar og resolusyon nga nag-awhag sa buhatan ni Magpale sa paghimo og imbestigasyon sa “Carmen Rain Dance 2010”.

Subay sa aligasyon ni Seno nga bastos ug pagdagmal sa katungod sa kababayen-an ang kalingawan.

Iyang gihulagway nga ang babaye nga nagsayaw nagsul-ob og mubo nga sapot halos molugwa ang dughan ug gipasiritan kini og beer sa mga lalake nga ningsalmot sa kalingawan.

Apan si Pua sa iyang bahin nanghimakak nga bastos ang maong kalingawan.

“Gusto lang nako nga masuwayan sa taga Carmen ang bag-ong matang sa kalingawan,” matod pa ni Pua sa sayo nga interbyu sa Sun.Star Superbalita.

Iyang gihulagway ang gibuhat sa konseho nga pamulitika kay mga kaalyado kini sa bise-mayor nga iyang karibal sa pulitika. (JFT)