KINING mao nga estoriya base sa kaso nga giapelar ngadto sa Supreme Court nga giduso sa akusado ug nahukman na.

Gipresentar dinhi ang duha ka mga habig, sa prosekusiyon ug depensa, nga maoy gibasehan sa hukom sa Labing Taas nga Hukmanan.

Ikaw nga nagbasa giawhag sa pagpadangat sa imong panahom sa kaso, kon ikaw ang pahukmon niini. Sa imong tubag, pinaagi ba sa mail o e-mail, ibutang ang imong kompletong ngan ug address.

Ayaw paggamit og codename kay ma-disqualify ang imong entry. Kon mogamit ka man og codename aron mao lay ipatik, ilakip ang imong kompletong ngan ug address.

"Matod Pa Sa Lola ni Noy Kulas." Join the story-writing contest on Cebuano folklore and win prizes.

Among ipatik ang inyong mga tubag uban sa inyong mga ngan. Ang imong tampo ipadangat lang sa Kon Ikaw ang Pahukmon, Sun.Star Superbalita, P. Del Rosario St. Cebu City.

Mahimo sab kini i-e-mail sa rrm@sunstar.com.ph o kulas@sunstar.com.ph. Kadtong tubag nga sakto ug maayong pagkahan-ay, dunay madawat nga cash isip ganti.

Pagdala lang kamo og ID sa inyong pag-claim sa premyo atol sa oras tingtrabaho, gikan sa alas 9am-5pm, Lunes ngadto sa Biyernes.
-EDITOR

NAG-ANGAT na ang Pasko. Hapit na sab ang bakasyon. Si Sheina niadto sa balay sa iyang classmate aron mangandam sa ilang pagabuhaton pagkasunod adlaw.Mga alas 11 kadto sa gabii sa Disyembre 12, 1997.

Pagkahuman, niadto siya sa balay sa iyaan sa iyang classmate nga diha ra sab sa kilid. Nibalik siya sa balay sa iyang classmate apan wa ra sab siya magdugay kay nakadungog siyang sitsit gikan sa balay sa iyang ig-agaw nga si Ana.

Sa iyang paglili sa sud, ngitngit ug mingaw apan, nisud gyud si Sheina. Wa siya mahibawo nga didto sa sud si Roland, higala sa amahan ni Ana, ug magkatulganan sa mao nga balay. Diha na siya makabantay pagkataudtaud nga si Roland naghigda sa lantay ug nagtutok kaniya.

Mobiya na unta siya apan gibitad siya ni Roland. Nilugnot siya apan wa siya makapiog sa kusog ni Roland. Gibitad siya ug gipahigda sa lantay. Gihulga siyang kulatahon kon di mosugot sa iyang gusto.

Gipugngan ang iyang duha ka mga kamot ug gipugos siya sa pagbilangkad gamit ang duha ka mga paa sa akusado. Gihubo dayon ni Roland ang short pants ni Sheina, cycling shorts ug panty.

Si Sheina mipukpok sa bungbong sa balay aron dunay makadungog, apan wa gyuy nitabang. Nipatong dayon kaniya ang akusado ug gibuong ang iyang pagkababaye. Kay una pa kadtong higayon, gisakitan siyag maayo. Iya na lang naamguhan nga dunay likidong init gikan kang Roland.

Samtang nagpatong pa si Roland, kalit nga niabot si Ana. Daling nibarog si Roland ug nilakaw samtang si Ana nibarog ug nipauli sa ilang balay.

Si Roland nangatarungan nga uyab sila ni Sheina. Niangkon siyang nag-sex sila. Kadtong sila nakit-an ni Ana, sinabutan nila kadtong duha nga saw-an ang kalipay ibabaw sa lantay.

Nagsugod siya sa pagpanguyab kang Sheina nianang Enero sa mao nga tuig ug gisugot niana nang Agusto. Managkaila sila sud sa 10 ka tuig kay managsilingan sila.

Nihatag pa kaniya ang biktima og loveletter apan nahanaw kini sa iyang pitaka.

Siya niingon nga ang una nilang panag-sex nahitabo sa gabii sa Agusto 27, 1997 sa usa ka jeep sa garahe. Ikaduha sa iyang birthday sa Septiyembre 4.

Katuohan ba ang alibay ni Roland? Ngano sab kaha nga dihang sila nasakpan ni Ana, nidiretso siya sa paglakaw? Tinuod gyud kahang uyab sila? Sad-an ba sila Roland, kana kon ikaw ang pahukmon?