Korean nga missing patay na

Tuesday, September 7, 2010

KOREAN national nakit-ang patay ilawom sa kadagatan sa dakbayan sa Lapu-Lapu human na-missing niadtong Lunes sa hapon samtang nag-diving uban sa lain pang mga Korean national.

Ang kapulisan nipalawom sa ilang imbestigasyon sa kamatayon sa langyaw kon wa ba magkaaway ang maong Koreano sa iyang mga kauban.

Have something to report? Tell us in text, photos or videos.

Updates on President Benigno Aquino III's presidency

Ang biktima giila nga si Yonggon Jeong Kyungwoo, 27, taga Seoul, South Korea, ug lima na ka adlaw dinhi sa Sugbo.

Kasamtangan siyang nagpuyo sa usa ka hotel sa dakbayan sa Sugbo.

Niadtong Lunes sa udto hangtod na sa hapon nag-diving ang biktima ug ang iyang mga kauban, uban ang usa ka Filipino nga diver.

Pasado alas 3:00 sa hapon sa dihang paingon na sila sa pagtunga gikan sa pag-dive sa ilawom, nibalik sa pagsawom si Kyungwoo tungod kay dunay mga pumpboat nga niagi ug posebling mahadlok kining maigo.

Apan natingala na lang ang iyang mga kauban nga wa na kini motunga.

Ang iyang mga kauban nisuway sa pagpangita kaniya apan alas 9:00 na lang sa gabii wa na nila makit-i. Nakahukom ang grupo sa pag-report ngadto sa kapulisan.

Si Senior Supt. Mariano Natuel, pangulo sa Lapu-Lapu City Police Office (LCPO), niingon nga dali silang nipahigayog search and rescue operation apan wa gyod nila makit-i.

Kagahapon sa buntag nibalik sila sa search and rescue operation ug pasado alas 7:00 sa buntag nakit-an si Kyungwoo nga patay na 19 metros ang gilawmon sa kadagatan sa Dakit-Dakit Point, barangay Maribago.

Si Insp. Juan Capacio, pangulo sa Homicide section, niingon nga nihimo pa silag imbestigasyon ilabi na sa diving shop kon di ba gubaon ang gigamit niining oxygen.

Lakip sa ilang gustong mahibaw-an kon si kinsa ang mga kuyog, kon duna ba gyod kiniy kuyog nga Filipino sanglit sigun sa balaod ang usa ka langyaw gidid-an sa pag-dive sa kadagatan sa bisan asang dapit sa nasud kon way kuyog nga Filipino nga nasuhito sa dapit.

Si Natuel niingon nga lakip sa ilang susihon labot sa relasyon sa namatay ug iyang mga kuyog tungod kay posebli usab nga nakaaway ang maong mga Korean national

Sa pagkakaron, ang lawas anaa gihaya sa usa ka local nga punerarya sa dakbayan sa Mandaue.