Kusug-NP rally sa hapon; artista nia

MAGBAHA sa mga artista karong adlawa dinhi sa Sugbo tungod sa duha ka dagkong mga rally nga himuon sa Nacionalista Party nga tambongan ni Nacionalista Party presidential bet Manny Villar.

Ang rally himuon sa mga siyudad sa Sugbo ug Talisay nga tambungan sa mga kandidato sa Kusug pinangulohan ni kanhi mayor Alvin Garcia ug sa tanan nga mga kandidato sa Alayon-NP sa unang distrito.

Alas 4 karong hapon ang rally himuon sa Cebu Coliseum ug sa mga alas 6 sa gabii mosunod sab ang rally sa Tabunok, Talisay city.

Plano unta sa Kusog nga himuon ang rally sa may Fuente Osmeña aron daghang tawo ang makatambong apan matod ni Garcia nga nisabot na lang sila nga di mahatagan og permit gumikan kay rush hour na man ug makahuot lang sa trapiko.

Tibuok slate sa Kusog ang motambong sa rally samtang di pa siguro kon ang tibuok line-up ba usab sa NP ang mosalmot.

Gipaabot nga mamulong sa rally sila si Villar ug nag-unang kandidato sa Kusog sama ni Garcia ingon man kandidato sa pagka-kongresista sa south ug north district sa siyudad nga sila si negusyante Jonathan Guardo ug Barangay Kapitan Mary Ann delos Santos.

Apan gawas sa pagpakigpulong, duna say idalit nga kalingawan sa rally kay dunay mga showbiz personality ang gidapit aron molingaw sa mga supporter nga naglakip kanila ni Jessa Zaragosa, Randy Santiago, Mae Rivera, bandang 6 Cycle Mind ug uban pa.

Kini maoy unang higayon nga dunay ang NP ug Kusog sukad gisugdan ang campaign period. Hinuon nakapahigayon na og rally ang NP sa Mandaue City, apan wa pa sila magkahiusa niadto sa Kusug.

Matod ni Garcia nga dugay na siyang nidapit kang Villar apan karon nalang gyud kini nakalugar.

“Actually we don’t need a major rally kay ang among gi-concentrate ang mga pulong-pulong sa kabarangayan. Pero amo ning gihimo para sa among mga supporter,” pasabot ni Garcia.Gidapit ni Garcia ang mga supporter sa Kusug ug Nacionalista Party nga magsul-ob og orange color.

Samtang si Richel Bacaltos, campaign manager sa Alayo-NP sa Talisay nagkanayon nga dunay re-routing pasado alas 5 sa hapon hangtod mahuman ang rally.

Ang mga de pasaherong mga sakyanan di makasulod sa Tabunok, apan mangita og laing agianan nga maoy kaagian sa mga de pasaherong mga sakyanan.

Ang pribadong mga sakyanan mahimong makasulod pa sa Tabunok.Ang mga de pasaherong jeep ug traysikol gihangyo nga di moparada sa Tabunok ug mangita kini og laing lugar nga ilang kaparadahan. (CPL/JFT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph