GIHAKOP sa tension ang Cogon Pardo kagahapon human diriyot mag-engkuwentro ang mga tanod sa mao nga barangay ug sa Inayawan, siyudad sa Sugbo.

Ang nakaingon mao ang basketball boards ni negusyante Jonathan Guardo sa sityo Mansanitas nga gitangtang sa mga barangay tanod sa Inayawan.

Sun.Star accepts donations for victims of Typhoon Ondoy

Ang mao nga sityo utlanan ug giilugan sa Cogon Pardo ug Inayawan.

Si Cogon Pardo Brgy. Captain Eugenio Gabuya, Jr. niingon nga sa miaging gabii, dihang nagpulong-pulong ang Bando Osmeña Pundok Kauswagan (BOPK) sa sityo, sa way pananghid sa mga tawo, gitangtang ang basketball boards.

Kagahapon sa buntag iyang gipataod pagbalik ang mao nga mga boards aron magamit sa mga batan-on sa nahisgutang dapit.

Apan sa mga ala una sa hapon kagahapon, gitangtang na sab kinig balik sa mga tanod sa Inayawan.

Nanumbong ang mga lumolupyo sa dapit sa brgy. hall sa Cogon hinungdan nga niadto ang mga barangay tanod.

Nagkasinukliay og mahait nga mga pulong ang pipila ka mga opisyal ug tanod sa duha ka mga barangay, apan napakgang ni Gabuya.

Iyang gidala ang mga tanod ug opisyal sa ilang barangay hall ug gipakigsultihan.

“Ako silang giingnan nga kon gusto mong manaod og boards, naay daghang tauranan dinhi sa akong barangay. Di man sila. Akong gipangutana kinsay nagsugo, ingon silang gikan ra sa taas,” nagkanayon si Gabuya.

“They (BO-PK) are always claiming nga daog na sila, way dag-anan si Atan. Kining ilang gibuhat mao niy makapapilde nila,” dugang ni Gabuya.

Siya nipasabot nga mga tulo ka buwan ang nakalabay, ang mga taga sityo Mansanitan nangayog basketball boards aron magamit sa mga batan-on.

Dihang nahasuroy si Guardo sa ilang dapit, iyang gipangayoan ang negusyante, kinsa dali kaayong nitubag sa ilang gipangayo.

Matod ni Gabuya nga bisan kon giangkon usab sa Inayawan ang dapit, ang mga tawo sa sityo anha modangop sa ilang barangay hall.

Samtang si Guardo nga gikuhaan og reaksyon niingon nga wa na siya mahibung pa niini.

Apan naguol siya alang sa mga batan-on.

“Di man akoy biktima ini. Ang mga batan-on man,” nagkanayon si Guardo.

Si Guardo magpapili sa pagka kongresista sa Cebu City south district batok kang Mayor Tomas Osmeña.