LAING garbo sa yutang Pilipinhon ang misakmit na usab og world title sa boxing. Ning higayona usa na ka babaye.

Ang US-based nga si Ana “The Hurricane” Julaton mikulit og kasaysayan sa dihang siya maoy unang Filipina boxer nga misakmit og world title sa niaging adlaw.

Iyang gipakaging ang beteranong si Kelsey “The Road Warrior” Jeffries didto sa HP Pavilion sa San Jose, California.

For updates from around the country, follow Sun.Star on Twitter

Ang 29-anyos nga Julaton, kinsa biya kaayo sa pustada (8-1), midaog pinaagi sa 10-round majority decision batok sa kanhi kampiyon nga si Jeffries aron langkaton ang IBA female super bantamweight title.

Sa taho sa Philboxing.com, ang Fil-Am sensation migamit sa iyang kaidlas ug kaabtik aron pagdominar sa beteranong si Jeffries. Duha ka judges mipabor kang Julaton, 98-92, samtang ang ikatulo mitabla sa away, 95-95.

Human makadungog sa desisyon, wa makapugong si Julaton sa kaugalingon ug nakahilak kini sa kalipay. Sa kadaugan, siya maoy ikaunom nga kasamtangang world boxing champ sa nasod uban nila ni Manny Pacquiao (IBO light welterweight), Nonito Donaire, Jr. (WBA interim super flyweight), Brian Viloria (IBF light flyweight), Donnie Nietes (WBO minimumweight) ug Marvin Sonsona (WBO super flyweight).

“Stick to the plan, you’re stronger than her, you’re faster, don’t get caught up in all her cheating!” kini maoy perming madungog ni Julaton gikan sa iyang trainer Nonito Donaire, Sr.

Si Julaton mipasaka na karon sa iyang record ngadto sa 5-1-1 samtang si Jeffries, human sa walo ka sunodsunod nga kadaugan, misugamak sa iyang ikanapulo nga kapildihan, 41 ka daog ug usa ka tabla.