GIUGBOK ni 7-footer Greg Slaughter ang iyang dominasyon sa ilawom ug gilupig si 6-10 Junmar Fajardo sa nagkainit nilang panagribal aron aswaton ang 8-time champion University of the Visayas (UV) Green Lancers ngadto sa 81-67 nga kadaugan batok sa University of Cebu (UC) Webmasters sa miaging gabii sa Game 3 sa college division finals series sa Cebu Schools Athletic Foundation Inc. (CESAFI) sa Cebu Coliseum.

Ang kadaugan maoy naghatag sa Green Lancers og 2-1 nga bintaha sa best-of-five series ug usa na lang ka daog ang ilang gikinahanglan aron maangkon ang ilang perpekto ug ikasiyam nga sunodsunod nga titulo.

"The Manny Pacquiao Blog". Click here for stories and updates on the Filipino boxing champ.

Sukwahi sa nag-unang duha ka mga duwa sa series, ang Green Lancers mao ang nagkontrolar hapit sa kinatibuk-ang duwa unya sa matag rally sa Webmasters hayan naa si Slaughter nga mopakgang dayon niini.

Ang Webmasters katapusang nakatilaw og labaw, 25-22, sa sayong bahin sa 2nd quarter sa pagpangulo nila ni Fajardo ug Moncrief Rogado.

Apan human niadto, gidugkatan ni Slaughter unya gitiwas ni Ritchum Dennison ang 10-0 run sa Green Lancers nga maoy naghatag kanila og 32-25 nga labaw.

Nakig-abag si Fajardo sa iyang rookie nga kauban nga si Franz Bernil aron tablahon pagbalik ang engkuwentro, 34-34, sa sayong bahin sa 3rd quarter.

Apan human niadto, nilihok na sab si Slaughter aron pangulohan ang laing 10-0 run sa Green Lancers nga gituldokan og three-point play ni rookie Ralf Olivares alang sa 44-34 nga bintaha.

Padayon si Slaughter sa iyang kabangis ug nainat niya ang labaw sa Green Lancers ngadto sa 60-45. Gikan niadto, wa na nakabangon pagbalik ang Webmasters.

Sa nahabilin pa lang kapin sa 4:00 minutos (66-52 ang labaw sa Green Lancers niadtong higayuna), daw niisa na sa ilang puting bandera ang Webmasters ug ilaha nang gipapahuway si Fajardo aron ipreserba ang enerhiya niini sa Game 4.

Gipasabot ni Webmasters coach Rhoel Gomez nga ilang nabantayan nga hago na gyud kaayo si Fajardo tungod sa sunodsunod nga mga duwa sa Game 2 ug 3
hinungdan nga ilaha na kining gipapahuway og sayo sa kahadlok nga masobrahan unya kini sa kakapoy.

Sama sa naandan, gipangulohan ni Slaughter ang Green Lancers pinaagi sa iyang 22 puntos samtang nidugang og 17 si Dennison.

Gipangulohan sab ni Fajardo ang Webmasters pinaagi sa iyang 24 puntos apan gawas kaniya, wala nay lain sa iyang mga kauban ang nakaamot og double-digit nga puntos.

Ang Game 4 ipahigayon karong hapon sa samang venue sugod sa alas 5:30 sa hapon.

Puntos kada usa:

UV (81)- Slaughter 22, Dennison 17, Calo 15, Cincoflores 10, Diputado 9, Olivares 5, Lao 2, Manigque 1.

UC (67)- Fajardo 24, Rogado 8, Juliane 8, Bernil 8, Abella 7, Quilantang 5, Tano 3, Cayanong 2, Mohamad 2.