Christopher V. Fajardo, Sr.
Mapulo, Garing, Consolacion, Cebu
Lumad ikaw nga usa gayud ka Pilipino
Nga nanimuyo sa pulo sa Mactan, Sugbo.
Ikaw ang pangulo sa kapin sa libo ka sundalo
Mga tabunon ug pulos gayud mga pagano.
Ang imong kaisog sa tibuok pulo gayud gibantog
Bisan si Raha Humabon sa away misibog
Dihang kamo sa utlanan sa dagat nag-ilog
Ug lig-on kang mibarog ug wa pabuntog.
Pulong gilitok sa inyong mga dila lunsay Binisaya
Kay kini maoy bililhong mutya sa kultura.
Mga babaye, mga lalake sa balitaw nag-awit
Uban sa tugtog sa kulintang nakigdait.
Unya sa Sugbo miabot ang mga langyawng Katsila
Aron isangyaw ang pagtulon-an sa ilang Bathala.
Sila Kristohanon kunohay buotan ug Diyosnon
Ug nadani sa pagpabunyag si Raha Humabon.
Lapu-Lapu ikaw sa langyawng Diyos wala ka motuo
Sanglit lumad pagano ka ug nagtuo sa mga anito.
Sa mga Katsila wala ka kanila makighigala
Bisan sa ilang hulga wala ka magpadala.
Ang imong baruganan way timailhan sa kausaban
Nga ikaw moyukbo kang Ferdinand Magellan.
Kini ang sinugdanan ikaw ilang gikasilagan
Ug ilang gisulong ang pulo nga imong gipuy-an.
Panting mo sa ilang mga kanyon gipabuthan –
Nag-ulan ang kalayo, makabungog ang mga buto.
Miasdang ka uban sa mga hinanib nga wa malisang
Ug miulan sab ang mga pana ug talinis nga kawayan.
Unya diha sa baybayon ang kampilan ug espada nagsangka.
Ang duha ka asero nga nagsingki nagpula sa kalayo.
Sa estokada ni Magellan imong eskrima wa pabintaha
Hangtod sa kamatayon siya sa baybayon nahilukapa.
Oo, Lapu-Lapu, ikaw gayud ang unang bayani sa mga Pilipino
Ug ang imong kaisog ug kabantog angayan ipasigarbo.