LABAW pa diay sa bugalbugal. Kay mahimong ingnon nga usa ka pasipala sa kaliwat nga Sugbuanon. Bisan buot ni Gloria Diaz tul-iron ang iyang gipamulong, di gihapon makatagbaw.
Una lugar, nganong Cebuano man gyud ang iyang gitumbok nga pananglitan sa iyang punto?
Nganong di man Bicolano nga ang gi-estoryahan mao man si Miss Universe 4th runner-up Venus Raj nga usa ka Bicolana? May gihambin siyang kalagot kanato.
Ang tanang Miss Universe contestants kuno makagamit og interpreter kon di makamao mo-Iningles sama sa usa ka Cebuano, morag ingon niini ang iyang gipasabot.
Husto gyud nga ming-alarma ang mga Cebuano sa iyang gisulti. Daghan ang nangasuko. Kon duol pa siya dugay na unta siyang gitagud-tagod sa daghang kasaba ug panghimaraot.
Kinsa man kini kuno si Miss Gloria Diaz? Sa tuig 1969 (manghod lag gamay sa panahon ni Mampor) nahimo kini siya nga unang Filipina nga napiling Miss Universe. Hastang garbuha ug lipaya sa mga Filipino niadtong higayuna. Miss Universe god.
Tungod niadto nahimong paborito ug inilog siya sa modeling world. Mitingkag sad ang mga dunggan sa movie producers kay buot mokuha niya sa ilang mga pelikula.
Hangtod nidawat siya sa usa ka film offer. Niadtong higayuna nauso na ang mga salidang bomba (sexual) nga paborito kaayo di lang sa mga batan-on ug hamtong hasta pod sa mga tiguwang lalake. Hubo-hubo god.
Nahuman ang maong pelikula ni Gloria Diaz. Ang ulohan: “Ang Pinakamagandang Hayop sa Balat ng Lupa.” Nahimo kining box office sa takilya. Wa hinuon siya maghubo, apan nahulma gihapon ang maanindot niyang lawas nga tuyuog humod sa tubig sa daghang mga eksena.
Ang pelikula di bastos matod sa usa ka kritiko kay hulma sa usa ka arte. Apan si Mang Tomas nga akong silingan nga nakakita sa salida hasta kapila magbalik-balik sa kasilyas. Unya iniggawas panington intawon.
Matod niya, diha kunoy wa makapugong sa sulod sa sinehan.
“Bastos!” singgit sa usa ka tawo kay naigo sa wa damhang sawilik. Unya, nakita nga may tawong gibira sa guwardiya ug giguyod sa gawas.
Niadto ang mga bata ug madre nasuko kang Gloria Diaz kay gitumban lang niya ang bili sa iyang pagka Miss Universe tungod sa salapi. Ang pelikula nga igo lang sa romansa diha-diha makabunlot baya sa sexual instinct sa tawo. Nakakita sad ko sa salida.
(gapasan.erns@yahoo.com)