NAWANI si Kabayan Noli sa Partido sa administrasyon. Sa kabit pa, na-inggaw siya. Kay gisabak man si Gibo Teodoro nga gikan sa NPC (Nationalists Party Coalition).

Duha lang ang tin-awng katarungan luyo niini. Wa na ganahi niya ang Pamuno. O, di ba si Noli mismo naglikay sa Lakas-Kampi (NUCD) kay ang pag-abin sa partido pulitikanhong paghawok man sa kamatayon.

Sun.Star accepts donations for victims of Typhoon Ondoy

Morag husto si Noli kon kini mao ang iyang katarungan. Tan-awa sa survey, nangikog si Gibo. Layo pa tuod ang piniliay, apan sa nakita maglisod si Gibo sa pagbawi.

Bisan ibubo pa sa administrasiyon ang tanan niyang kahimanan ug rekursos, morag di na matabang. Ang katawhan giluod na gayud sa mga tawo diha sa Malakanyang.

Si Gibo tuod limpyo. Utokan kay bar topnotcher. May kasinatian kay nahimong kongresista sa tulo ka mga termino ug karon Kalihim sa Nasudnong Panalipod. Talagang magaling at matalino.

Apan ang galing at talino di na magsilbi karon. Natagam na ang mga tawo kang Marcos. Di sad to hilabwan si Marcos sa pangutok lang kay bar topnotcher sama kang Gibo. Apan naunsa man ang Pilipinas sa iyang pagdumala? Tagaktak daw kawayan nga buak.

Dinhi nasipyat ang Palasyo, wa nila alimahi si Noli. Puli-Pamuno, apan wa nila tahura.

Ubos sa prinsipyo sa “equity of the incumbent”si Noli ang angayng mahimong standard bearer sa administrasiyon.

May labok unta ang Lakas-Kampi. Si Noli may dakong sumosunod diha sa masa. Sa iyang pagka puli-pamuno, wa kahugawi ang iyang ngalan sa panikas ug pangurakot.

Isip tsirman sa Housing, maayo ang iyang agi. Gipakita niya ang iyang kamatinud-anon sa katungdanan. Gani sa mga survey, naa siya sa top 5, kon wa ko masayop.

Gihugon-hugon nga magpa-reelect si Kabayan. Dako kaayo ning posibilidad. Si Villar, Gibo ug Erap wa pay klarong runningmate.

Apan labing seguro, di gyud makig-ipon si Noli kang Gibo. (Di ba kaha supak sa Batakang Balaod ang pagdagan ni Noli? alang sa reelection. Susihon ni).

Kon makadagan mangurog gyud sila Mar Roxas ug Loren Legarda, labi pa si Loren. Giihaw na siya ni Noli sa 2004 elections.

Niprotesta, apan way nahitabo. Karon mobalik si Legarda. Unsay gianaran?

Hinuon, lingin ang bola. Way makatagna kon kinsa ang modaog.

Apan klaro nga lisod pang tumbahon si Kabayan Noli. Paningtog bugnaw gyud ang iyang ikaaway karong umaabot piniliay.

Nakapili na kining lindog kon kinsay dapigan pagka puli-pamuno.

Apan akong isangyaw nga si Kabayan maayo nga materyal bisag pamuno pa sa atong nasod kay kugihan ug matinud-anon. May kasinatian na sab.

(gapasan.erns @yahoo.com)