Lariosa: Pag-angkon sa kaakuhan
Tuesday, September 7, 2010
More Sections
HAPIT kuno mabitas ang baba sa mga kritiko ni Pamuno Aquino sa pagtukiki. Tungod kay iyang giangkon ang kaakuhan o responsibilidad sa nahitabo sa miaging maduguong hostage crisis.
Palpak gyud nga Pamuno, singgit nila. Di kuno angayan nga mahimong lider sa nasod. Kon si Gibo Teodoro pa kuno ang gipili di unta to mahitabo. Maluwas gyud unta tong mga biktima sa hostage-taker nga Sr. Insp. Rolando Mendoza.
Have something to report? Tell us in text, photos or videos.
Updates on President Benigno Aquino III's presidency
Tinuod, natuwad sa ubos ang kredibilidad ni Pamuno Aquino sa maong hitabo. Dali ra patuohon ang katawhan man god sa mga kritiko nga nagpuhonan sa maong hostage crisis.
Si Noynoy kuno wa gyud pakita. Bisag eek lang way nadungog.
Sa mga mabuot nga tawo nga nakasabot sa burokrasya, si Noynoy di kinahanglan nga mopakita o mosulti atol sa maong hitabo.
Tungod sa mga hut-ong sa hirarkiya sa kagamhanan. Kargo man gyud to sa Philippine National police (PNP).
Si Noynoy nga maoy Pamuno di angay mangunay. That’s out of the situation. Gawas kon ang PNP magpatabang kaniya. Aduna siyag pagsalig sa PNP ug sa crisis management pagsulbad sa maong hostage drama.
Giangkon sa PNP ang ilang kapalpakan gani nagpaubos dayon ang mga hintungdan sa imbestigasyon. Ang mga kritiko buot gyud nilang pakasad-on si Noynoy.
Iapil pa nila si Gibo nga dugay na tawon nagpakahilom.
Karon nahiwi hinuon ang ilang baba sa morag samplita nga gihimo ni Pamuno Aquino nga mao ang pag-angkon sa responsibilidad sa maong hitabo. Kalit nga nahilom ang ilang pagtukiki.
Kay halangdon ang pag-angkon ni Noynoy sa kapalpakan sa iyang mga sakop. Naiway dayon ang hanap nga pagtulod-tulod kon kinsay hinungdan sa kapalpakan diha sa hut-ong sa hirarkiya sa PNP.
Kon kapalpakan ang nahitabo, giangkon na ni Noynoy. Nagpasabot nga ang sayop sa iyang mga sakop iyang sayop. Niini, gipakita niya ang kalig-on sa iyang liderato. Wa siya molihay sa gitawag nga “command responsibility.”
Niini, nasemento niya ang kahiusahan sa PNP pagpaluyo sa iyang liderato. Nikayab pagbalik ang moralidad sa kapulisan. Kini tungod sa iyang pagbarog nga wa batia ang pagpanuko ug kauwaw sa pagpangangkon sa responsibilidad.
Ang katawhan mingdayeg sa iyang gihimo. Ug ang uban pa kaha to, ipahid na ang tanang sala sa usa lang ka makaluluoy nga sakop.
Kini ang batasan sa kadaghanan sa atong mga pulitiko nga kanunayng mangipsot sa responsibilidad.
Sayri Kini. Babay sa akong brother-in law nga si Francisco “Totoy” Taborada nga nihalin na sa panuigong 70. Sa buhi pa, siya mahigalaon ug maabiabihon. Sa among pagsandurot nakita ko ang pagmahal niya sa pamilya ug kabanay.
Ilubong siya karong Sabado sa hapon sa Carreta cemetery. Ang iyang haya anaa sa Liggayu residence, Bliss, Labangon. Cebu City.
