SA sinugdanan mao si Georgia Osmeña. Dayon sulod si Winston Garcia. Si Georgia manghod ni Tomas, mahimong mabadlong sa katapusan nga di na magsamoksamok.

Apan lahi ni si Winston. Kon tininuod ning iya nga modagan pagka mayor sa siyudad, makuyawan gyud si Mike Rama. Si Rama di man si Tomas.

Sun.Star accepts donations for victims of Typhoon Ondoy

Ang iyang gisaligan mao ra gyud ang back-up ni Tomas.

Angayng mahibaw-an nga si Winston di manananggot nga nagdamgong magmayor. Usa kanhi ka pulitiko kay PB member sa lalawigan sa dugayng panahon. Sakop sa banayng Garcia nga nag-una sa pulitika sa Sugbo.

Karon, President ug General Manager sa GSIS (Gov’t Security & Insurance System). Nahimong kontrobersiyal ang pagdala sa GSIS, apan lig-on kay naa gihapon sa puwesto.

Gituohan nga tungod ni Gloria naa pa si Winston. Back –up politically sa iyang mga igsuon ug amahan di siya sad matandog.

Mahimong ingon niini, apan kining lindog nagtuo nga may nakitang maayo sa iyang performance si Gloria nganong siya gipabilin.

May kuwarta si Winston nga ikagasto sa kompanya. Kon iyang siguruon, mahimong iyang paliton ang mga botante sa siyudad. Lisod tuod dag-on sa kuwarta ang BOPK basta Osmena. Kay lagi, bisag unsaon Osmeña gihapon. Apan kon Rama, baw lang.

Apan ang kusog ni Rama tungod ni Tomas di sad ma-underestimate. Matan-aw nga kombati gyud ang eleksyon. Kon di mogamit si Winston og kuwarta, hayag ang kadaugan ni Rama. Kahibawo man ta nga ang mga Sugbuanon kuwag gusto kang Winston tungod sa mga hitabo diha sa GSIS. Apan kon bangilan lagig kuwarta, alsa gyud sa tumoy si Winston.

Kini man god ang kamatuoran sa pulitika karon. Kuwarta ang dag-anan. Kay kon di tinud-on paggukod ang vote-buying, wa gyuy “ Ako ang Simula…” nga mahitabo karong piniliaya.

Ang mahimo lang gyud sa mga batan-on karon ubos sa “Ako ang Simula…” mao ang pagkompanya batok sa mga tradpol, kanang nangguwis sa puwesto nga wa gyuy nahimo ug kanang nagbalikbalik lang. Mga bag-ong nawong ang gikinahanglan.

Si Rama kinahanglang mopakita sa iyang labok. Unsa may iyang himuon kon mahimo na siyang mayor? Mao lang gihapon ang iyang lihok?

Daghan kaayong usbon diha sa nawong sa siyudad gawas sa kangitngit sa mga dalan panahon sa kagabhion.

Ang challenger nga si Winston, kinahanglan sad nga adunay plataporma nga makadani sa mga Sugbuanon ngadto kaniya. Kanang makahimo sa siyudad lahi sa tanang dakbayan. Di kay sunod-sunod lang sa uban nga ang resulta mao lang gihapon.

(gapasan.erns@yahoo.com)