Lariosa: Taboan 2010
Tuesday, February 9, 2010
More Sections
DAKONG panagtagbo sa mga magsusulat sa tibuok kalibutan mahitabo dinhi sa siyudad sa Sugbo sugod karong adlawa hangtod sa Biyernes. Giulohan kinig “Taboan 2010: Philippine International Writers’ Festival.”
Proyekto kini nga gitambayayungan sa Cebu Arts Council ug sa National Commission for Culture and the Arts (NCCA).Gawas dinhi sa Pilipinas, gilauman nga makatambong ang pipila ka mga banggiitang magsusulat sa ubang mga dapit sa kalibutan.
Have something to report? Tell us in text, photos or videos.
Click here for stories and updates on the Sinulog 2010 Festival.
Giatol ning panahuna ang Taboan 2010 tungod kay ang nasod nagsaulog sa “Buwan sa Arte” nga mao ang Pebrero. Ang kasaulogan may dakong kahulogan sa kinabuhi sa mga ulipon sa arte sama sa mga magbabalak, magsusugilanon, pintor, eskultor, mag-aawit, mananayaw ug uban pa.
Kining dakong panagtagbo gipangulohan ni Dr. Hope S. Yu nga mao ang regional Literary Coordinator sa NCCA ug professor sa languages sa University of San Carlos (USC). Sukad masukad karon pa kini mahitabo sa Sugbo.
Daghang nahimo si Dr.Yu sa iyang pagka coordinator. Nakalibro siya sa “Kapulongan” ug sa “Kulokabildo,” mga panahom sa mga Cebuano writers sa arte sa panuwat. Mga paghubad sa Ingles nga naglibro sad sa mga sugilanon ni Gremer Chan Reyes, “Men at Sea” ug nobela ni Lina Espina Moore, “Mother.”.
Tungod kaniya nakalibro na sad ang Bathalad. Ang “Pasumbingay” nga nagpunpon sa mga balak sa mga sakop. Ikaupat na ning antolohiya sa mga balak sa taga Bathalad (Bathalan-ong Halad sa Dagang).
Mga tulukibon ang mga panghitabo sulod ning tulo ka mga adlaw nga panagtagbo. Gawas sa fellowship night, daghang mga pasundayag nga magpakita sa kulturang Sugbuanon. Dunay poetry reading ug pakigpulong sa mga banggiitang magsusulat dinhi sa ato ug sa taga laing dapit.
Kay di man gyud paiwit ang mga Sugbuanon, mailhan unya dinhi nga dakong buhi ang atong literatura apil na ang kinatibuk-an sa atong kultura. Mawara-wara ang lumad nga garbo atubangan sa daghang mga langyaw.
Di ikalimod nga kining maong panagtagbo makabayaw sa atong pinulongan ug literatura nga mailhan sa tibuok kalibutan. Ang atong mga magsusulat di na unya malisang sa umaabot nga kataw-an lang ang ilang mga obra.
Di mapakyas si Dr.Yu kay hugopan kini sa mga magsusulat sa Sugbo nga mga sakop sa Bathalad, Ludabi, ug Dagang Foundation, Inc., apil ang taga Mindanao nga mga sakop sa Bathalad didto.
Labing seguro nia sad ang mga Ilonggong magsusulat, Waray ug Kinaray-a. Di sad pabiya ang mga Biclondia writers, Ilokano, Tagalog, Pampango, Tausog ug uban pa.
Hudyaka ug suliyaw kini sa kasaulogan sa atong mga pinulongan.
Apan ang motigbabaw mao gayud ang mga magbabalak nga Sugbuanon nga maghugyaw tungod sa ilang mga balak, awit, ug nagbukal nga alak.
