SUSPETSADONG drug pusher nga giingong maoy naghupot sa illegal drugs operation sa tibuok lungsod sa Cordova nasikop sa mga sakop sa Philippine Drug Enforcement Agency (PDEA) kagahapon sa kaadlawon.

Gikatahong matinabangon ang suspek nga si Estanislao Yap Jr., alyas Ontong, 35, kinsa nasikop sa ronda sa usa sa iyang mga pinuy-anan sa sityo Matab-ang, barangay Day-as, sa mao nga lungsod, pasado alas 5 sa kaadlawon pinasikad sa search warrant nga giisyu ni RTC Judge Soliver Peras.

For updates from around the country, follow Sun.Star on Twitter

Nasakmit gikan sa suspek ang 102 ka mga pakete sa gituohang shabu nga gibanabanang nagkantidad og P15,000, nagkadaiyang drug paraphernalia ug P2,055 cash nga gituohang kabahin sa iyang halin.

Atol sa pagsikop kaniya wa mosukol si Yap.

Matod ni Jessie Tabanao, tigpamaba sa Pdea-7, nga duol usa ka buwan nilang gipaubos sa surveillance ang suspek, kinsa giilang level 2 drug pusher nga maka-dispose hangtod usa ka kilo sa gituohang shabu sud lang sa usa ka semana.

Mga sakop sa Special Warfare Group (Swag) sa Philippine Navy niabag sa Pdea sa pagpahigayon sa operasyon.

Ila nang gipanagan-an ang paglaban sa mga silingan kay gikatahong ang suspek maoy giilang “Robinhood” sa ilang dapit.

Giingong matag tapos sa buwan mopalit ang suspek og napulo ka sakong bugas ug ipanghatag sa iyang mga silingan ug manghatag usab og kuwarta kon makadaog sa buwang.

“Niingon lagi ang mga silingan didto nga mao nay nagpakaon namo dire,” pagkutlo pa ni Tabanao sa pamahayag sa mga silingan dihang nasayran ang pagkasikop ni Yap.

Nanag-iya usab ang suspek og daghang mga traysikad ug ang mga drayber niini maoy nagsilbi niyang mga runner ug look-out.

Matod ni Tabanao nga kadaghan na rondaha ang suspek apan tungod sa iyang mga look-out, idlas kaayo ning masikop.

Gani mga duha ka buwan ang nilabay, gironda siya sa Criminal Investigation and Detection Group (CIDG) apan nakaipsot.

Gawas sa Cordova, duna say pipila ka barangay sa Lapulapu ug Danao City ang giingong gisuplayan og shabu sa suspek.

Nag-atubang usab ang suspek og kasong attempted murder apan nakapiyansa.

Hinungdang gitinguha karon sa Pdea nga ipa-revoke ang iyang piyansa aron di na makagawas sa prisuhan bisan pa kon mogawas sa laboratory exam sa PNP Crime Lab nga minos og 5 gramos ang nasakmit nga mga shabu. (CPL)