GUMIKAN sa selos, gipatay sa 71-anyos nga bana ang iyang 71-anyos nga asawa atol sa ilang panaglalis niadtong Huwebes sa gabii.

Ang magtiayon nagkalalis sud sa ilang balay sa brgy. Pulangbato, Bogo city ug nisangko sa pagbunalbunal sa bana og kahoy sa iyang asawa.

Sun.Star accepts donations for victims of Typhoon Ondoy

Ang bana nihulga pa untang maghikog, apan napugngan sa kapulisan nga niresponde sa alarma.

Si SPO3 Allan Dosdos imbestigador sa Bogo Police Station nga nahinabi sa Sun.Star Superbalita niila, sa namatay nga si Erenia Argawanon, samtang ang suspek mao si Alberto Argawanon.

Ang magtiayon adunay unom ka mga anak nga pulos na minyo ug taga didto ra usab sa maong dapit.

Ang duha nagkalalis nianang gabii tungod kay nagselos ang bana sa iyang asawa.

Niinit ang ilang panaglalis ug taliwa niini, ang suspek nikuhag kahoy ug gibunalan ang asawa sa ulo ug uban pang bahin sa lawas.

“Maorag kanang kahoy nga lingin og porma. Dako sad, morag bukton ang gidak-on,” asoy ni SPO3 Dosdos.

Apan buntag na nila nahibaw-an ang krimen human sila gipahibawo sa mga anak sa magtiayon.

Mga anak niasoy sa kapulisan nga nga wa na sila pasudla sa ilang amahan sa ilang balay tungod kay matod pa niini iyang napatay ang ilang inahan.

Kon mopugos silag sulod, mapugos usab siya sa pagpakamatay gamit ang gunting.

Ang kapulisan nga nitubag sa alarma pinangulohan ni Supt. Tito Satera nilampos hinuon sa pagpa-surrender kang Alberto.

Sa ilang imbestigasyon wa moangkon ang gikatahapan nga iyang napatay ang iyang asawa.

Siya nangatarungan nga nahulog lang kini sa ilang gihigdaan.

Apan ang mga anak di motuo tungod kay sigon sa ilang asoy kanunayng mag-away ang ilang mga ginikanan tungod kay magselos sa ilang inahan.

“Gawas pa, sila rang duha. Unya kon nahulog dunay bun-og sa lawas gawas sa ulo,” dugang ni SPO3 Dosdos.

Sa pagkakaron, ang gikatahapan gitanggong na sa Bogo Police Station samtang karong adlawa ilang ipasaka ang kasong parricide batok sa bana. Human nga mayoriya sa ilang mga anak nipahibawo nga andam silang mopasakag kiha batok sa ilang amahan.