BETERANONG manunuwat sa Sugbo nipanaw na sa laing kalibutan.

Namatay si Job Bonotan Tabada sud sa Coronary Care Unit sa Cebu Doctor’s Hospital mga alas 6 niadtong Biyernes sa gabii human sa upat ka adlaw nga pagka-ospital.

Nag-edad siya og 58-anyos.

Na-admit si Tabada niadtong Lunes sa tungang gabii human nakuyapan samtang nag-inom og kape sa paborito niyang coffee shop nga atbang ra sa nahisgutang ospital.

Niabot siya gikan sa Taiwan niana lang pagkabuntag human sa tulo ka adlaw nga tour sa Taipei City uban sa laing mga sakop sa media.

Ang iyang mga kabanay nitug-an nga duna nay heart condition si Tabada ug nagmintinar na kini og tambal.

Gani gitambagan siya sa iyang mga kauban sa buhat nga di nalang mokuyog sa biyahe apan niuban gyud kini.

Samtang tua sa Taiwan, nagpadala kini og report sa iyang gialagarang Cebu Daily News pinaagi sa email.

Matod ni Sun.Star Superbalita Opinion Editor Anol Mongaya nga di si Tabada ang klase sa tawo nga magpaapekto sa iyang sakit.

Iyang nabiyaan ang iyang asawang si Annie, ug tulo ka mga anak nga sila si Jobannie, Herald ug nagbinugtong babaye nga si Free.

Si Jobannie nga kanhi sports editor sa Sun. Star Cebu kasamtangang tua sa Dubai apan gikatakdang mopauli human nasayod sa kamatayon sa iyang amahan.

Sud sa upat ka dekada nga nagserbisyo sa Cebu media si Tabada.

Katapusan niyang gialagaran ang Cebu Daily News isip usa sa mga columnist.

Nagsugod siya niadtong 1998 human moretiro sa RPN-9 isip section editor.

Niundang siya sa desk work tungod sa iyang sakit apan nagpabilin gihapon sa pagsuwat sa iyang column.

Sa RPN-9, siya maoy local ug national correspondent ug na-promote sa pagka-news director.

Sud sa 20 ka tuig siyang nagserbisyo sa nahisgutang telebisyon.

Kanhi usab siya editor-in-chief sa Cebu Advocate ug Morning Times, managing editor sa Visayan Herald ug weekend editor ug columnist sa Republic News.

Nahimo usab siyang section editor sa The Freeman ug Sun.Star Daily, nga karon giila nang Sun.Star Cebu.

Nagsilbi usab siyang stringer sa Philippines News Agency.

Usa ka aktibistang tinun-an si Tabada nga apil sa naaresto niadtong panahon sa Martial Law. (CPL gikan sa SSC)