NAKAKUHA og dugang rason si pound-for-pound champion Manny Pacquiao nga mas magmadasigon sa umaabot niyang away batok kang WBO welterweight champion Puerto Rican Miguel Cotto karong Nobiyembre 14 sa MGM Grand Garden sa Las Vegas, USA.

Kini human niya napatigbabawan ang tanang mga boksidor sa tibuok kalibutan lakip na si kanhi P4P king Floyd Mayweather Jr. sa piniliay sa Yahoo! Sports Top Figther.

Si Pacquiao nakakuha og 238 puntos gikan sa respetadong 25 ka mga miyembro sa voting panel nga gilangkuban og international boxing writers. Nakakuha siya og 13 ka mga boto.

Sun.Star accepts donations for victims of Typhoon Ondoy

Sikit nga nagsunod kang Pacquiao mao si Mayweather Jr., kinsa nakahakot og 233 puntos samtang naa sa ikatulo si WBO junior middleweight champion Paul Williams, kinsa adunay 165.

Si Shane Mosley, kinsa nagpreparar na sa umaabot niyang away batok kang Andre Berto sa sunod tuig, naa sa ikaupat dala ang 148 puntos samtang naa sa ikalima si Juan Manuel Marquez.

Nahimutang sa ikaunom si Cotto, kinsa nakatigom og 129 puntos, unya ikapito si Bernard Hopkins kinsa adunay 115.

Mokumpleto sa top 10 mao sila si IBF light heavyweight champion Chad Dawson (57); Arthur Abraham (43) ug IBF ug WBO heavyweight kingpin Wladimir Klitschko (33).

Ang laing Pinoy nga si Nonito Donaire Jr. nakakuha sab og boto ug nahimutang siya sa ika-16 kauban si Indonesian featherweight king Chris John.

Ang ubang mga nakakuha og boto mao sila si Ivan Calderon, Juan Manuel Lopez, Israel Vazquez, Rafael Marquez, Vitali Klitschko, Celestino Caballero, Timothy Bradley ug Hozumi Hasegawa.

Sa laing bahin, padayong nagpakahilom si Pacquiao kabahin sa mga prediksyon sa mga sakop sa Team Pacquiao nga molampos gyud ang Pinoy boxing superstar pinaagi sa knockout.

“Mahirap magsabi nang tapos eh. Di naman natin alam anong mangyayari. Dasal lang tayo sa Lord. Ano man mangyari, idasal na lang natin kung mapabilis o mapaaga or... matapos yung round. Siya lang nakakaalam eh,” asoy ni Pacquiao sa interbyu sa abs-cbnnews.com.

“Basta sa akin, training lang ako nang husto, dasal at pagkatiwala sa kaniya pagdating sa ring.”
Panahom ni American trainer Freddie Roach nga matikangkang na si Cotto sulod lang sa 1st round.

Si conditioning coach Alex Ariza wa mohatag og unsa nga round apan masaligong ma-knockout gyud si Cotto samtang si Canadian adviser Michael Koncz nagtuo nga mahitabo ang knockout sa ulahing bahin sa away.

Sa kasamtangan, si Pacquiao hugot nga nag-ensayo sa Wild Card gym ni Roach sa California. (ESL)