ANG sala sa Regional Trial Court (RTC) Branch 5 maoy mohusay sa mga kaso nga gipasaka batok sa anak ni Talisay City Mayor Socrates Fernandez nunot sa pagpanion og armas sa usa ka lumolupyo sa dakbayan sa Sugbo sayong bahin ning buwana.
Atol sa pag-raffle sa korte sa mga kasong illegal possession of firearms ug kalapasan sa Commission on Election (Comelec) gun ban nga gipasaka sa kapulisan batok kang Joavan Fernandez, kini napunta kang RTC 5 Presiding Judge Douglas Marigomen.
Wa pa matakda ang petsa kon kanus-a ipahigayon ni Marigom ang arraignment sa kaso ni Joavan nga ning higayona gawasnon human nakapiyansa og P160,000 sa mga kaso nga iyang giatubang.
Nasayran, sa hiniusang pinanumpaang pamahayag nga gisumiter sa mga pulis sa Talisay City Police Station nga silang Roy Logranco, Arnold Damasco ug Rusty Pelayo nisaysay nga dihang ilang gisusi ang puwang Isuzu Trooper ni Joavan nga maoy iyang gimaneho dihang nasikop, ilang nakit-an ang .45 caliber Colt pistol, mga bala lakip ang ubang mga kagamitan niini. (JECT)