NAILHAN na sa kapulisan ang mastermind ug usa sa mga gunman sa sunodsunod nga pag-ambush sa managsuong negusyante sa Sugbo.
Matod sa kapulisan nga ang mastermind usa ka negusyante samtang ang gunman nalambigit sa pagpamatay ug pagpayuhot og drugas.
Ang negusyante nga gikan sa Mindanao maoy gikabangi ni Manuel Ting hinungdan nga maoy usa sa gitutukan karon nga anggulo sa kapulisan nga negusyo ang motibo sa pagpatay.
Kini ang gibutyag sa usa ka kasaligang tinubdan nga usa ka opisyal sa kapulisan nga nahinabi sa Sun.Star Superbalita ubos sa kondisyon nga di siya nganlan.
Matod sa tinubdan nga may kasusyo si Ting sa usa ka negosyo nga nagbase sa Mindanao, apan nagkabangi sila sa kwarta.
Gikasuko kini sa kasusyo.
Tungod ning mao nga impormasyon nakig-alayon karon sa ilang counterpart sa Mindanao ang Police Regional Office (PRO-7), aron masubay ang bag-ong anggulo.
Ang nibanhig kang Manuel Ting may posibilidad nga mao usab ang nibanhig sa iyang igsuon nga si Nicholas Ting sa Mandaue city, kinsa anaa pa karon sa tambalanan.
Dugang pa sa tinubdan nga nailhan ang triggerman ni Manuel kay dunay nakakita nga saksi nga nakaila kaniya kay iya kining nahimong silingan sa giabangan niining balay sa dakbayan sa Sugbo.
Ang gunman usa k ka gun-for-hire ug nalambigit usab sa drugas. Nagtago-tago na kini karon.
Ang Taskforce Ting nilusad na og hilom nga manhunt aron pagsikop sa gunman sa habagatan nga bahin sa lalawigan sa Sugbo, apan nakaikyas na kini.
Buot subayon sa kapolisan kon ngano nga nagkaila ang negusyante ug ang gunman.
Gibutyag usab sa tinubdan nga posibling giuna sa pagpusil si Nicolas kay mao kini ang giila sa magsuon nga mosukol, aron di makabawos sa mastermind.
Samtang giangkon ni Task Force Ting commander Sr. Supt. Ramon Melvin Buenafe nga duna na silay mga testigos nga gihuptan nga mosaksi batok sa gunman.
Ang mga saksi nakaila kaayo sa gunman nga ilang nakit-an atol gyud sa pag-ambush kang Manuel sa may F. Llamas st., Brgy. Tisa, siyudad sa Sugbo niadtong Martes.
Nailhan sa mga saksi ang gunman human ilang gipakita ang mga hulagway sa mga kriminal nga gun-for-hire.
Si Buenafe nagkanayon nga usa ka gun-for-hire ang killer ug nalambigit na kini niadto og mga patay ingon man extortion apan sa pagkakaron di pa nila ikabutyag ang ngalan niini.
Nagpadayon karong ang ilang paggukod sa gunman sanglit wa pa kini makagawas sa Sugbo.
Hinuon duna silay mga sakop nga naglihok sa mga silingang lugar.
Gipadayag niini nga ilang gipaningkamutan nga masulbad ang maong krimin sa labing madaling panahon ug mapasakaag kaso ang mga responsible kay maoy mando sa ilang labaw nga si Chief Supt. Lani-O Nerez..
Iya sang gikompirmar nga ang ni-ambush sa magsuong Ting usa ra.
Giklaro niya nga sa panahon nga ilang madakpan ang gunman ilang makompirmar ang kalambigitan sa negusyante.
Dunay tulo ka mga testigos karon ang ilang gihuptan ug ilang gipaningkamutan nga makakuha pag dugang testisgos samtang giawhag usab nila kadtong ubang mga tawo nga nakakita sa krimin nga motabang.
Ang Task Force Ting sumala pang Sr. Supt. Buenafe dunay igong ebedensya batok sa gunman nga maka-pinpoint nga maoy nipsil kang Ting human nakita ang larawan niini.
Ang uban pang mga angulo sa krimin wa pa nila gitangtang.