Mga Durano mipasalig nga Gibo modaog sa 5th district
Wednesday, April 28, 2010
More Sections
MGA Durano nipasalig nga mohatag silag makabungog ug dakong kadaugan ni Lakas-Kampi-CMD Gilberto “Gibo” Teodoro sa 5th district sa lalawigan sa Sugbo.
Sa interbyu sa Sun.Star Superbalita kang Kong. Ramon “Red” Durano VI, siya niingon nga kompyansa kaayo sila nga modaog sa ilang distrito si Teodoro.
Have something to report? Tell us in text, photos or videos.
Click here for Election 2010 updates
Gani, sa ilang gipahigayong survey sa unang semana sa kampanya, naglabaw lang og 10 porsyento ang labing lig-ong kaatbang ni Teodoro.
Apan karon nga nagpaluyo na sila kang Teodoro ug sa One Cebu, gipaneguro niya nga modaog sila si Teodoro ug Gobernador Gwen Garcia ug mga kauban sa Mayo 10 nga eleksyon.
“Kami man gud when we commit to a candidate, we make sure gyud nga mobarog mi sa among commitment and we deliver to that candidate,” matod ni Durano.
Siya niingon nga sukad pa sa panahon sa ilang mga amahan, ilang giampingan ang ilang reputasyon.
Kon komitido sila sa usa ka kandidato, ila gyud kini nga barugan ug ilang mahatag ang gikinahanglan nga botos sa usa ka kandidato.Dugang pa ni Durano nga subay sa ilang pagtimbangtimbang, si Teodoro maoy labing kwalipikado nga kandidato sa pagka presidente.
Ang 5th district adunay 10 ka mga lungsod ug usa ka siyudad, nga dunay 300,000 ka rehistradong mga botante.
“Wa miy ikapasalig nga number of votes. Pero makaingon ko nga majority sa votes among mahatag ngadto kang Gibo,” matod ni Durano.
Dugang niya nga makakuha usab og dakong botos si Garcia ug negusyante Glen Soco.
Samtang si Soco nagpasalamat usab nila ni Kongresista Eddie Gullas ug Durano sa gipasalig niini nga suporta sa iyang pagpapili pagka bise-gobernador ingon man kang Garcia. (JECT)
