Mga mananagat sa Borbon mitiyabaw

Sunday, March 21, 2010

GIBANABANANG kapin sa 500 ka mga mangingisda sa lungsod sa Catmon ug Borbon ang ningtiyabaw kay apektado na ang ilang panagat sa gihimong seismic survey sa Deparment of Energy ug Nor-Asian Energy sa kadagatan sa maong mga lungsod.

Moabot na usab sa 62 ka mga payao ang nangadaot gumikan sa survey, 33 niini sa Borbon ug 29 sa Catmon.

Have something to report? Tell us in text, photos or videos.

Ang payao usa ka angkla nga kawayan sa lawod nga pasilungan sa mga isda diin didto magtapok ang mga mananagat aron pagpangisda.

Click here for Election 2010 updates

Nasayran nga dunay usa ka payao ang gipanag-iya og di mominos napulo ka mga mananagat.

Apan ang ubang mga mananagat nga way mga payao apektado usab kay ningminos na ang ilang mga kuhang isda.

Si Cresencio Cantiga, kansang payao sa Catmon Bag-o maoy usa sa naguba, niingon nga sukad niadtong Biyernes wa na gyud siya kapangisda maong naglisod na siya sa pagpalit og bugas.

Aron dunay ipakaon sa iyang pamilya, matod ni Cantiga nga nanginabuhi nalang una siyay isip panday.

“Lisod gyud kaayo kay wa naman ko kapangisda ani. Para naay makaon akong pamilya, nagpanday nalang sa ko,” nagkanayon si Cantiga nga nahinabi sa Sun.Star Superbalita pinaagi sa telepono.

Ang mga kaubanang mananagat ni Cantiga nagplanong makigkita ni Mayor Estrella Arival aron mangayo og danyos sa nangadaot nilang payao.

Matod ni Glemar Bacusmo sa Panaghugpong sa mga Gagmay’ng Mangingisda sa Sugbo (Paman-Sugbo), nga dunay gisaad nga compensation ang DOE-Nor-Asian nga P11,000 matag mananagat.

Apan matod ni Bacusmo nga ang usa ka payao nga ibutang ilawom sa kadagatan ug buhaton sa di mominos napulo ka mga tawo nagbalor og di moubos sa P12,000 maong di gyud igo ang ihatag nga compensation.

“Pero di man gyud nay maoy demand sa mga mananagat. Ang ilang demand nga wa gyuy himuong kadaot sa kadagatan kay ang after-effect man unya ani nga wa nay mga isda nga mobalik anang lugara,” pasabot ni Bacusmo.

Karong adlawa gikatakdang makigkita sa mga mananagat si Anakpawis Partylist Representative Joel Maglungsod aron matabangan ang mga apektadong mangingisda maong gisibog ugmang adlawa ang pakigkita usab nila sa mga environmental lawyer.

Matod ni Bacusmo nga duna gyuy himuong legal nga lakang ang mga mananagat batok sa mga opisyal sa gobyerno nga nitugot sa pagpahigayon sa seismic survey taliwa sa hugot nga pagsupak sa mga mananagat. (CPL)