MOBIYA na gyud sa Cebu South Bus Terminal ang mga mini bus.

Matod ni Julie Flores, presidente sa Cebu South Mini Bus Operators Association (CSMBOA), nga nagpadala na sila og suwat-hangyo niadtong Miyerkules kang Cebu City Mayor Tomas Osmeña pinaagi kang Konsehal Sylvan Jakosalem nga nangayong katugtan silang makagamit sa Cebu Auto Bus terminal nga maoy temporaryong terminal sa mga mini bus.

Sun.Star accepts donations for victims of Typhoon Ondoy

Kini tungod kay buot na ang mga mini bus operator nga mobiya na gyud sa CSBT tungod sa kahasol ug kasamok mugna sa bag-ong patakaran nga gipatuman sa Kapitolyo ubos sa pagduma ni Byron Garcia.

Gawas pa niini, matod ni Flores, duna say ordinansa ang Siyudad nga nagdili na sa mga mini bus nga makasud lapas sa dan Panganiban aron pagminos na gyud sa kahuot sa trapiko duol sa terminal area.

Ang ordinansa bag-ohay pa lang gipasar sa konseho sa Siyudad.

Ang ilang giplanohang himuong terminal sa Cebu Auto Bus naa nahimutang eskina N. Bacalso ug V. Rama avenue.

Sa ilang suwat ilang gihangyo nga ang V. Rama avenue mao unyay magsilbi nilang entrance samtang ang habig sa N. Bacalso maoy ilang exit.

Kon mouyon ang mayor, matod ni Flores nga ilang paninguhaon nga makabalhin na sa bag-ong terminal sa dili pa ang Pasko.

Nasayran nga kagahapon usab napupos ang usa ka buwang tagal sa gipatumang status quo ni Gov. Gwen Garcia sa mga mini bus.

Sa miaging buwan, gidid-an na unta ang mga mini bus nga makasud sa terminal tungod sa giingong pagpabadlong sa ilang mga drayber nga mo-pick up og mga pasahero gawas sa terminal bisan kon gidili kini.