NAGGAMIT na lang og kandila ang police station sa Consolacion human sila putli og kuryente ni Mayor Avelino Gungob.

Di na pud matawagan ang telepuno human sila giputlan og linya.

Sun.Star accepts donations for victims of Typhoon Ondoy

Mga pulis sa Consolacion sugod sa milabayng gabii nigamit na og kandila sa ilang pag-alagad, sama sa pagsuwat sa blotter.

Si Gungob niingon nga iyang gibarugan ug gitinuod ang nauna niyang hulga nga putlan niya og suporta ang kapulisan pinaagi sa ilang linya sa kuryente ug telepono.

Matod pa sa mayor nga gikahinabi sa dyRF Radyo Fuerza nga iya kining gihimo nga baruganan tungod ug alang kanila nga mga mayor.

Matod pa ni Gungob nga di siya makatugot nga sayonsayunon lang sa kapulisan ang gahom sa usa ka mayor.

"Gihimo ko ni, alang ra usab sa akong mga kauban nga mayor nga sayon-sayunon lang nila ug di respituhan," matod pa niya.

Gitumbok niya si Sr. Supt. Jesus Gaquing nga way respito kaniya pinaagi sa pagkuha sa iyang mga bodyguard nga wa ganiy igong konsultasyon.

"Kuwang sila og pamatasan. Ila kong gibinuangan. Wa sila mangutana nako og unsa ka tinuod ang pasangil sa akong bodyguard. Gideritso niya og kuha ni Gaquing" atod pa ni Gungob.

Ang mga barangay tanod gipatawag na usab ni Gungob sa milabayng adlaw aron sa pagpangandam kon ugaling mamahawa sa iyang lungsod ang kapulisan.

Ang mga barangay tanod maoy plano sa mayor nga ihulip sa kapulisan nga maoy momintinar sa kahusay ug kalinaw sa iyang lungsod.

Gibutyag usab ni Gungob nga nipasaka na siya og pormal nga reklamo batok kang Gaquing ngadto sa National Police Commission.

Matod sa mayor nga klaro kaayo nga adunay bulok pulitika ang pasangil batok sa iyang mga bodyguard tungod kay kanunay niya kining ikauban.

Ang mga kaatbang sa pulitika ni Gungob ang iyang gipasanginlan nga maoy nagpaluyo.

"Bisan unsay ilang buhaton sa mga pulis, bisan asa sila mamalhin, wa koy problema, basta ilang gasto," matod sa mayor.