MINILYON ka pesos nga kantidad sa sinakong semento nga iya sa Probinsya ang giingong nausik kay nadaot na lang kay wa magamit mga proyekto sa lalawigan.
Apan ang Kapitolyo niingon nga di kini tinuod kay ang mao nga mga sinakong semento alang man sa nagpadayong mga proyekto niini.
Ang liboan ka mga sinakong semento gipangtabunan og trapal sulod sa motorpool sa lalawigan sa Sugbo.
Si Bise Gobernador Greg Sanchez niingon nga tungod sa kakuwang sa pla-no ug way klarong programa ni Gobernador Gwen Garcia nausik ang maong mga sinakong semento.
Dugang ni Sanchez nga si Garcia namalit og semento sukad pa niadtong 2005 ug gipang-apod-apod sa kalungsuran ug siyudad aron magamit sa mga proyekto sa kabarangayan.
Apan kini wa mahurot pag-apod-apod ug anaa na-tanggong sulod sa motorpool nga gipangtabonan og trapal.
"Dunay mga barangay nga nakapahimulos. Pero daghan sad ang wa gyud makapahimulos. Wa na maato sa pag-deliver kay daghan man kaayo na. Tungod sa lack of planning ug programming, nahitabo na," matod ni Sanchez.
Subay sa programa sa gobernador, ang siyudad o lungsod nga hatagan og semento motampo ug materyales alang sa proyekto sa barangay.
Samtang ang barangay motampo usab sa lalawigan, pinaagi sa paggahin og salapi aron ibayad isip labor cost sa proyekto.
Apan di tanan nga barangay maka-afford sa labor cost tungod sa kakuwang sa ilang budget, nagkanayon si Sanchez.
Nakadawat og taho si Sanchez nga adunay mga semento nga gipahimudsan personal sa pipila ka mga opisyal sa siyudad, lungsod ug barangay.
Adunay uban nga gidapat sa ilang balay ug adunay uban gipamaligya.
Apan si Manlalaban Rory Jon Sepulveda, tigpamaba sa gobernador, niingon nga di tinuod nga nausik ang semento nga gipamalit sa probinsya.
Ang mga semento nga anaa sa motorpool gigamit alang sa pagtukod og mga school building, tipik sa mga proyekto nga gihatagan og unang pagtagad sa gobernador.
"Way nausik nga mga semento. He is referring to stocks for our on going school building projects," matod ni Sepulveda. (JFT)