PAMILYANG Ting nanawagan sa mga sakop sa media ug publiko sa paghunong na sa mga estorya nga ang ilang pamilya may kalabotan sa sunodsunod nga mga patay sa ilang tagsa-tagsa ka amahan.
Sa labing unang higayon, ang pamilyang Ting nipagawas og opisyal nga pamahayag nga nanghimakak sa report nga away sa ilang pamilya ang motibo sa pag-ambush sa managsuong Manuel ug Nicolas Ting.
Kagahapon sa hapon, sila si Nixon Dizon Ting ug Basil Ting, kinamaguwangang mga anak nila ni Nicolas Ting ug Manuel Ting nipagawas og joint statement.
Matod sa duha nga ang ilang pamilya nanawagan ug naghangyo sa publiko ug mga sakop sa media sa paghunong na sa tabi-tabi nga ang pagpangatake sa ilang amahan nag-ugat sa ilang away sa pamilya. "But what we can assure ourselves and to each other is that our conscience are clear,"sa ilang opisyal nga statement.
Sila nagkanayon nga bisan kon dayag na sa publiko ang ilang panag-away apan sila nagtuo nga imposebling mahimo ug buhaton kini sa ilang pamilya ang pagbinaslanay sa usag-usa.
Ilang gidugang nga way bisan unsang rason ug hinungdan nga mahimo kini sa ilang pamilya tungod kay ilang gipasalig sa usag-usa nga limpyo ang ilang konsensya.
Matod nila nga anaa karon sila sa kasub-anan ug naapektuhan sa hitabo sa ilang amahan ug ang nadungog gikan sa publiko ug balita sa media nga nagduda kanila di makatabang pagsulbad sa kaso.
Hinuon, kusganon nilang giawhag ang kapulisan nga pakusgan ang ilang imbestigasyon ug masikop ingon man mahatagan og hustisya ang hitabo. (DRT)