Mi-plead not guilty

MI-PLEAD not guilty ang akusadong gipasanginlang mi-upload sa iyang sex video uban ang 13-anyos nga dalagitang menor de edad sa social media atol sa iyang arraignment kagahapon, Disyembre 27, sa Lapu-Lapu City Hall of Justice.

Si McClark Alvaro Aying nag-atubang og kasong kalapasan sa Republic Act (RA) 9995 kun ang gitawag ug Anti-Photo and Video Voyeurism Act of 2009 ug ingon man RA 7610 kun Anti-Child Abuse Law sa sala ni Presiding Judge Christine Muga-Abad sa RTC Branch 70 sa dakbayan sa Lapu-Lapu.

Si Aying nasikop niadtong Disyembre 4 sa gabie sa mga sakop sa Mactan Police Station sa Lapu-Lapu City Police Office pinaagi sa usa ka entrapment human siya gipasanginlang mi-upload sa iyang law-ay nga video uban ang usa ka 13-anyos.

Kasamtangan siyang gawasnon human giingong mipiyansa ug P20,000.

Hugtanong gibarogan ni Aying nga wa siyay kalabotan sa pag-upload sa iyang sex video uban ang 13-anyos apan ilang nasabotan ang nahitabong pakighilawas.

Sa pakighinabi sa akusado ning mantalaan iyang gibutyag nga dako ug epekto sa iyang pagkatawo ang kaso nga gisang-at batok kaniya.

Gawas nga nauwaw siya ug ang iyang pamilya sa pasangil batok kaniya wala na usab siya matod pa magtrabaho sa Chinese restaurant nga iyang gialagaran kaniadto diin usa unta siya ka assistant chef cook gumikan sa hitabo.

Nabalaka na usab siya nga wala nay modawat niya ug trabaho gumikan sa kasong iyang gi-atubang.

“Dako kayo ug epekto sa ako wala nako pabalika sa akong trabaho, nag stay lang sa ko sa balay nako karon sir kay kuan pako sa ako kaso, amo paninguhaon nga ma abswelto jud ko ani kay wala man gyud koy kuan gyud dili ako ang nag-upload ana” matod pa ni Aying.

Ang inahan sa 13-anyos nga dalagitang reklamante wala gitago ang kalagot gumikan sa pag plead not guilty sa akusado.

Iyang gibutyag nga aduna silay ebidensya nga magmatuod nga na-upload gayud ang video busa mas maayo pa ug niangkon na lang ang akusado.

Mas grabe usab matod pa ang epekto sa nahitabo sa ilang pamilya gumikan kay wala na sa iyang kiliran ang iyang 13-anyos nga anak sanglit anaa na kini karon sa kustodiya sa mga social worker sa dakbayan.

Sa milabayng pasko usab anglabing unang higayon nga wala mag pasko ang iyang anak uban kaniya ug mao usab kini matod pa ang iyang masinati sa bag-ong tuig.

Naundang na usab ang pagtungha sa iyang anak gumikan sa hitabo.

“Lagot kaayo ko sa nga tanan sir, lagot ko kay namakak siya, naa man tay ebidensya unya moingon pa siya nga not guilty pwerti jud nako lagota sa iyang giingon nga not guilty siya” matod sa inahan.

Si Anita Jumamil ang Gender and Development (GAD) officer sa Brgy Basak dakbayan sa Lapu-Lapu nga maoy mitabang sa 13-anyos nga reklamante mibutyag nga wa gayuy mahitabong settlement tali sa pamilya sa 13-anyos nga reklamante ug sa akusado.

Kini human nakadawat siya matod pa taho nga adunay plano makighinabi ang ginikanan sa akusado ngadto sa 13-anyos nga reklamante.

“Mao lage gi-safety na lang namo ang bata, amo nang gi safety kay lisod kayo sa nga tanan ba, amo jud ning idayon dili mi mo-settle kay makabiktima na pud ba lisod kaayo sa tanan” sumala pa ni Jumamil.

Ang sunod hearing sa kaso gitakda sa Pebrero 20 sunod tuig.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph